Shillong: Ka kynhun ialehkai kynjatbol na kane ka nongbah, ka Shillong Lajong FC ka la shah liem noh ha ka North East United FC da 3-0 ha ka jingialehkai ka lympung Durand Cup ha JN Stadium, Polo.
Ka North East United FC kala rung sha ka phainal kane ka lympung. Ka jingshah rem ka Lajong kala pynjew slew ia ki paidbah nongkyrshan.
Ha ka jingialehkai mynta ka sngi, hapdeng ka Lajong bad ka North East United, la wan sakhi palat 15 hajar tam ki paidbah ha madan JN Stadium, Polo Shillong.
Haba kren sha ki lad pathai khubor hadien ba la wai ka jingialehkai, u coach ka Lajong u Jose Hevia bad u coach ka North East United u Juan Pedro Benali, kila pynpaw ia ka jingkyndeh mynsiem ban iohi ia ka jingieid kynjatbol ki paidbah ka jylla Meghalaya.
U coach ka Lajong ula ong ba ka jingshah rem ka Lajong ka dei na ka jingshah thep nyngkong ia ka kol na ka jingbakla bad ka jingshah thep ia ka kol kaba ar kala pynduh mynsiem. Ka Lajong kala shah thep ia ka kol kaba lai hadien ba ka la sah sa tang 10 ngut ha madan na ka jingioh red card uwei u nongialehkai.
U la ong ba um lah ban klet ia ka jingieid phutbol ki paidbah hangne ha Meghalaya bad ula ong ba un trei tyngeh ba ka Lajong kan ioh iakhun ha ka Indian Super League.
Katba u coach ka North East United ula ong ba ka jingioh thep nyngkong ia ka kol, kala iarap ia ka kynhun ban ioh ia ka jingsngew skhem.
Ula ong ba ka jingwan sakhia ki paidbah ia ka jingialehkai ka dei shisha kaba ai mynsiem ia ka kynhun bad u la ong ba kane ka Durand Cup kan dei ka jingpyneh met shuh ia ki nongialehkai ha ka lympung ISL.
Phi don ban ong eiei?