Iap ar, ba ther kuli ki GNLA

Shillong, 17 Nailur:
Ar ngut ki briew ki la iap katba kiwei ki la mynsaw jur haba ki suba dkhot ka seng lehnoh ka Garo National Liberation Army (GNLA) ki la synreit kuli ia ki paidbah ha kawei ka shnong kaba don ha South West Garo hills district ha ka step sngi Hatmajai.
Kane ka jingjia ka la long ha ka por 1.30 ei ei mynstep phyrngab haba ki suba dkhot ka GNLA ki la synreit kuli ha katei ka shnong Garobada, la ong ka khubor na ki pulit.
Ki pulit ki la ong ba ki dkhot ka seng lehnoh GNLA ki la siat ia ka iing jong uwei u briew ba kyrteng u Ganandra Hajong bad Anirud Hajong. Namar kane ka jingjia, ka Sridina A Sangma (32) bad u Sotindro Chandrabala Hajong (35) ki la iap hashen na ka jingksam ki kuli.
Kiwei pat kynthup Jetika Hajong (14) bad Chandrabala Hajong (35) ki la mynsaw jur na ka jingdei ki kuli bad la rah sha jaka sumar. Ki pulit ki dang pynjur ia ka jingpahara ha katei ka thain ban kem ia kiba donkti.