Iap 42 ngut, mynsaw 1117 ba khih biang U jumai ha Nepal Kathmandu,

12 Jymmang:
Hadien ka jingkhih u jumai bah ha ka 25 tarik u iaiong ha Nepal uba la shim haduh 8000 ngut tam ki mynsiem briew, bad da ki phew phew hajar kiba mynsaw, sa shisien biang u jumai u la khih ha katei ka ri ha ka sngi u Blei ha kaba u la khih haduh saw sien ha ka shisngi, hynrei hadien ka sngi u blei ruh mynta ka la don biang ka jingkhih jumai kaba khlain bor bha ha katei ka ri kaba la shim haduh 42 tylli ki mynsiem briew bad 1117 ngut kiba mynsaw.
Utei u jumai uba la khih mynta ka sngi u dei uba khlain bor haduh 7.3 magnitude ,ka jingjia ka la jia ha ka por 12:35 baje mynsngi , kham ha shwa ki bor kiba thew ba woh ia utei u jumai ki la io hjingkhein ba u dei 7.4 magnitude hynrei ka la don biang ka jingpynbeit ba ka dei 7.3.
Ka Dolakha bad Sindhupalchowk districts ki dei ki ar tylli ki distrik kiba la shah ktah bha ha ka jingjia kaba la jia mynta ka sngi ha kaba ha Dolakha ki la don haduh 19 ngut kiba iap. Tang hadien katei k ajingjia hadien kumba 30 minit ka la don biang ka jingkhih kaba khlain haduh 6.3 magnitude ha kaba bunbah ki ing ki la khyllem ha katei ka jingjia kaba ar ha ka shisngi. Lah ban kdew ba ka jingjia kaba shyrkhei duh ka dei ha ka 25 tarik u iaiong kaba u jumai u ba khlain bor 7.9 magnitude u la khih ha katei ka ri bad kumba 8000 ngut tam ki la iap. Katei ka jingkhih jumai kaba ar sngi ha ka shitaiew ( sngi u blei bad hat majai) bad hynriew sien ha ka ar sngi ka la pynthud ia ki lad iarap kiba dang ai jingiarap ban pyllait im ia ki lanot kiba la ngat ha u jumai uba la jia ha ka 25 tarik u iaiong.
Katba ha India pat, ki la don haduh 16 ngut kiba la iap ha bihar ha katei ka jingkhih u jumai mynta ka sngi, ha kaba ki ing paki dulan ki la khyllem bad ki jaka ba la shah ktah eh ha bihar ki dei ka Darbhanga, Patna, Sitamarhi, Purnia, Siwan bad Katihar. Mynta ha jylla Bihar ki paidbah kim shym la shong shuh hapoh ing hynrei ki la mih ha madan bad sahmiet ha madan ban lait na ka jingmynsaw lada jia ba khih biang u jumai. U Myntri rangbah katei ka jylla u Nitish Kumar u la hukum ban shna da ki dara bad ban pynbiang ia ki umdih umbam bad kiwei de ki jingdonkam ha ka jaka bas ah ki paidbah.