Iap 40ngut ha Damascus

Damascus (Syria),
25 Risaw:
Ki shipai ki swar ka sorkar Syria mynta ka sngi ki la ther kuli ia ki nongiakhih pyrshah sorkar bad katei ka jingjia ka la jia hajan ka nongbah Damascus ha kaba 40 ngut ki nongiakhih ki la iap ha katei ka jingjia, ong ka tyllong khubor. Katei ka jingther kuli ka dei kaba la leh da ki bor shipai ka Syria pyrshah ia ki nongiakhih kiba tur pyrshah ia u President Bashar Assad.
Shuh shuh , la ioh lum jingtip ba ki riew kieng atiar ka Kurdish ki la hiar thma ia ki nongiakhih ka jihadi ha ki thain shatei ka Syria kaba mar khappud bad ka Iraq ha kaba la mih bun ki jingjulor bad ki jingduh jingum ha baroh arliang. Kiba kum kitei ki thma pohing bad ki jingia umsnam ki dei kiba ju jia khah khah ha Syria bad kaba kum katei ka jingjia ka dei ka ba la jia ha ka sien kaba lai h akatei ka Ri.
Katei ka jingiather kuli hajan Damascus ka la mih tang da ki kynta hadien ba u President Assad u la kurup ia ka sorbah ka Hatitat al-Turkomen ka bynta ba shathie jong ka nongbah, kaba dei ruh ka khyrdop bah kaba pyniasoh ia ka Nongbah bad ka Damascus International Airport.
Ka thymmei khubor ka la iathuh ruh ba ki 40 ngut ki nongiakhih ki la iap hadien ka jingther kuli jong ki shipai Syria ha ki bynta ka thain Otaiba, bad la ioh ban kurup shibun ki tiar siat kiba kynthup ia ki rocket , ia katei ka bynta ba la jia katei ka jingjia la tip kum ka Eastern Ghouta, kaba dei ruh ka jaka kaba la jia ka jingther lyer bih ha u Nailar ba la dep ha kaba kynthup naduh ki shynrang, kynthei bad ki khynnah khyllung ki la iap.
Uwei na ki heh shipai ka Syria haba kren bad katto katne ki lad pathai khubor u la ong ba napdeng kitei ki 40 ngut kiba la iap ki don ruh ki nongiakhih pyrshah kiba dei ki bar-ri , ha ki khubor TV kiba pathai khubor la iohi ia bun tylli ki metiap kiba la pynthiah lyngktar harud wah ryngkat bad ki tiar ialeh jong ki ki riflle bad ki hand grenade. “Ngin nang jam shakhmat na kawei ka jingjop sha kawei pat” ong u heh shipai uba la batai ba ki bor shipai ki dang iakhun shaid shis shaid ban pynduh jait ia kiba kum kitei ki kynhun thombor bad ki kynhun ialeh pyrshah.