Iap 3 ngut, mynsaw 10 ngut ba tyngkhuh kali ha Umkiang

Jowai, 18 Nohprah:
Lai ngut ki briew ki la duh noh ia la ki mynsiem ba kordor jong ki bad 10 ngut kiwei pat ki la mynsaw jur ha ka jingjia tyngkhuh kali mynta ka sngi dangstep ha ka por kumba 7:45 am eiei ha ka shnong Umkiang.
Ka khubor ka la iathuh ba kawei ka Tata Sumo kaba don ia u No. ML04B-1681 kaba dang iaid lynti na Khliehriat sha Kalain, Assam bad ynda ka la poi ha Umkiang ka la ia tynrah bad kawei ka trok Dumper kaba don ia u No. AS01C 0696 bad ha kane ka jingjia lai ngut ki briew kiba shong ha katei ka Sumo ki la khlad noh hashen katba 10 ngut kiwei pat ki la mysaw jur. Kiei kiba la khlad noh ia tip kyrteng kum u Baldur Pala uba na ka shnong Tluh, U Think Dkhar uba naka shnong Jarain (Sutnga) bad u Bran Summer uba na ka shnong Paloi, Assam.
Ia kiba mynsaw la pynkit sha ki jaka ai jingsumar katba ia kitei kiba la khlad noh la aiti ia ki sha ki ba haiing hasem na ka bynta ban pyndep ia ka niam.