Iap 2 ngut na ka prie ha Lamalong

Shillong, 6 Nailur:
Ar ngut shipara ki la duh ei la ka jingim hadien ba ki la kem pang prie bad pynhiar kaba la trei borbah ha shnong Lamalong, Ri Bhoi District.Ka kong Eskwela Sten kaba la 27 snem karta bad ka Kong Lak Sten 22 snem ki la khlad noh ha kane ka sngi Balang.
U Rangbah shnong, bah Jowis Umbah ula iathuh ba katei ka jingpang ka la sdang ban trei naduh ka ar tarik mynta u bnai, bad ar ngut shipara ki la duh noh ia ka mynsiem na ka jingban jur ka jingpang tang ki khyndiat sngi.
Ula iathuh ba katei ka jingpang haba sdang ka trei kum ka prie bad pynhiar bad hadien ki nongpang ki ioh sa ka jingpang khie ring ki kti ki kjat, kumta ki shem shitom ban ai jingsumar ia ki briew kiba ioh ia katei ka jingpang.
Halor kane, u bah Umbah ula pyntip sha ka tnad jong ka koit ka khiah, bad kyrpad ba kin phah lem ia ki doctor ban ai jingiarap ban iada namar katei ka jingpang ka dangtrei jur haduh mynta ia ki longkmie bad ki khynnah khunlung.
Halor kane ka RUPA Ri-Bhoi Zone lyngba President bah A. Nongpoh ka kyntu ia ka tnad jong ka koit ka khiah ka sorkar jylla, ba kin shim khia ban ai jingiarap ia ki briew kiba ioh ia katei ka jingpang ha Lamalong kumjuh ban ai ki lad jingiada ia ki briew bad ki shnong ba marjan.