Ïap 2 ngut, mynsaw bun ngut ha ki 3 sngi ba ther u lapbah

Shillong, 17 Nailar:
Ar ngut ki mynsiem briew, ki la duh ei, ha ka jingther u lapbah ha kane ka lai sngi ar miet.
Kat kum ka khubor kaba la ioh lum la iathuh ba ha ka miet jong ka 13, 14 tarik mynta u bnai bad kumjuh ruh ha ka 15 tarik, ka jingther bad neh jong u slap ka la wanrah ia ka jingshlei um bad jingtwa khyndew ha kylleng ki jaka.
Ka jingjia ba sngew sih ka long ha ka shnong Mawdngung kaba hap hapoh ka Sohiong Outpost, ha kaba ar ngut ki khynnah rit ia kiba la tip kyrteng kum ka Sarana Thabah ( 13 snem) bad ka Sathi Thabah (6 snem) ki la duh noh ia la ka jong ka jingim na ka daw ka jingshah ban ha ka khyndew.
Ka jingtwa khyn dew ka la jia ruh hajan Lad Bakli ha thain Dangar ha kaba ka la ktah lut ia ka leit ka wan bad kumjuh ruh ka jingdheng kali. Kawei ka Jingkieng iaid kjat kaba pyniasoh ia ka shnong Tyrsad bad kiwei ki san tylli ki shnong ka la shah rah ha ka um, hadien ba ka wah ka la heh bha.
Ka Wahumkhrah ruh ka la shlei hi smam na ka jingther jong u ‘ lap bah, ha kaba ka la wanrah ia ka jingshlei um, khamtam ha ki thain Polo bad Pynthorbah. Bun tylli ki longïing ki la hap ban kynriah shipor shapoh ka Pynthorumkhrah Community Hall. Wat la ka jingheh ka wahumkhrah ka la rah lut ia ki jaboh jabain, hynrei kane ka la wanrah ruh ia ka jingeh, namar ba ka la shlei ha ki iingsah jong ki briew ha katei ka thain. Ha ka jingjia na ka jingshlei um ha Polo bun ki la don katto katne ngut ki paidbah kiba la mynsaw bad la pynkit ia ki da ka kali 108 sha Civil Hospital, Shillong.
Ha ka thain Keating Road, Shillong, la iathuh ba lai ngut ki briew ba kynthup ia u Johar Uddin (45), u Md. Sukur Ali ( 50) bad u Akbar Ali ( 35) ki la shah tep hapoh ka khyndew. Ki pulit jong ka Fire & Emergency Service lem bad ki pulit ka jylla ki la hiar kyrkieh sha katei ka jaka na ka bynta ban leit pyllait im ia ki bad la ong ba ka la shim por haduh hynriew kynta ban ioh sei ia ki napoh ka khyndew kaba la tap bad la pynkit noh ia ki sha Civil Hospital, Shillong ban pynioh ia ki lad ai jingsumar. Ka jingtwa khyndew ka don ruh ha ka thain Bishnupur kata ha SB/ CID Complex, kaba la ktah shibun ia ki briew ba shong ba sah ha kane ka jaka. Lah ban kdew ba ha ka 14 tarik mynta u bnai ar tylli ki ing ki la shah tyllep ha ka khyndew kaba la twa ha Khliehshnong Wahkdait , Malki , Shillong.