Bhopal,13 Risaw:
115 ngut ki pilkrim kynthup shynrang bad kynthei ki la iap bad palat da ki spah ngut ki la mynsaw ha ka jingialymbub para briew ha ka jingkieng shuwa ban poi sha ka jaka donnam ka Ratangarh temple kaba don hapoh Datia district ka Madhya Pradesh ha kane ka sngi u Blei. Katei ka jingjia ka la jia ha ka por ba kitei ki pilkrim ki dang thmu ban leit jngoh kaitei ka jaka kaba ha u snem 2006, ki la don 50 ngut ki pilkrim ki la iap ha katei hi ka jaka.Katei ka jingkieng ka dei kaba don ha ka Wah Sindh kaba la tip kum ka wah nguid briew ha kaba da ki lak ngut ki pilkrim na Madhya Pradesh bad na UP ki la wan ha ka sngi kyrpang ka Navami ha katei ka sngi.
Katei ka jingjia kala jia ruh hadien ba ka her ka khubor hamsaia ba ki ia don kiba ong ba ka jingkieng wah Sindh kan khyllem noh bad da ki lak ngut ki pilkrim ki la ia kulmar ka iamareh bad ia tyngian para briew bad katei ka jingleh jong ki ka dei hadie ba ki la tieng artad ia ki pulit kiba hap ban shu bom da ki lathi jong ki. Ha katei ka jingjia katba kiwei pat ki pilkrim ki la shah iuh bad shah kyrdem , kiwei pat ki ngam jyllop hadien ba ki la rynsied shapoh um.
Ki metiap ki la thiah lyngktar ha jingkieng bad ki kynhun ai jingiarap ki pulit ruh ki la poi dier por ha katei ka jaka namar ka jingdheng kali kaba 10 km. Ki la don tang khyndai ngut ki pulit langrut bad uwei u SI ha katei ka jingkieng kaba jrong 500 mitar kaba la ia thyngngian da ki lak ngut ki briew ha ka por ba la jia katei ka jingjia.
U Myntri Rangbah u Shivraj Singh Chouhan u la hukum ban leit tohkit mar mar ia katei ka jingjia, ka President ka seng congress ka Sonia Gandhi ka la pynpaw ia ka jingsngew bitar halor katei ka jingjia.
Ka Ratangarh temple ka don 55 kilomitar ka jingjngai na Datia district headquarter bad 405 km na ki thain shatei ka Bhopal. “Haduh mynta ngi la lap haduh 100 tylli ki metiap , bun ngut ki pilkrim ki la iap ha lynti ban leit sha hospital , kane ka jingjia ka lah ban dang iai jia” ong u heh pulit haba kren sha ki nongthohkhubor. Kiba iohi ia katei ka jingjia ki la ong ruh ba ka jingiakynad ka la mih hapdeng ki ar kynhun ki briew ha ka por ba la jia katei ka jingjia.
Phi don ban ong eiei?