![](https://www.urupang.com/wp-content/uploads/2023/09/DSC00677-23.jpg)
Nongpoh: Ki la don kumba 10 tylli eiei ki sniang, kiba la ri hapoh kawei ka jaka ri sniang ha shnong Saiden, ia kaba la peit la khmieh da ka Nangku Chaphrang Multipurpose Co-operative Society Ltd, ki la iap bad khlem da tip na kawei ka daw ba ki iap.
Katei ka jingiap jong kitei ki sniang kiba la ri ha katei ka jaka, ka dei kaba la jia ha ka sngi Nyngkong ka Taiew ba la dep, ha kaba katkum ka jingiathuh jong kiba peit hapoh katei ka jaka ri sniang, la ong ba baduh katei ka sngi bad haduh mynta ka jingiap ki sniang ka iai bteng beit man ka sngi.
Ki briew kiba peit ha katei ka jaka, tang mar ia iohi ia ka jingiap jong kitei ki sniang, ki la pyntip sha ki briew ka tnat Veterinary Nongpoh, khnang ba ki leh ia kaba donkam bad ban pyllait na ka jingiap ia kiwei pat ki sniang kiba don hapoh katei ka jaka ri sniang.
Katkum ka jingiathuh da ka briew kaba peit ia kitei ki sniang, ka la ong ba ha kaba nyngkong, ki sniang ki la shu kem pang shit, hadien kata pat ki sangeh noh ha ka ban bam ne dih um bad kham hadien pat kitei ki sniang ki la shu iap noh hi.
Haba iadei bad ka jingiap sniang ha katei ka jaka, na ka liang ki briew na ka tnat Veterinary, ki la phah ia ki briew ba ki leit leh Post Mortem, khnang ban lap ia ka daw jong ka jingiap kitei ki sniang, hynrei kat haduh mynta ym pat tip ia ka daw jong ka jingiap kitei ki sniang bad ba ki iap na kaei ka jingpang, namar ia ka kaiphod ym pat ioh.
Phi don ban ong eiei?