Shillong:Ka la mih ka jingiapyni nia hapdeng u nongialam liangpyrshah u Dr. Mukul Sangma bad u myntri rangbah u Conrad K Sangma halor ka jingkylli kaba iadei bad ka jingsiew ia ki consultant ba wanrah nabar.
U Dr. Mukul ula buh jingkylli ba hato ka long kaba shisha ba ka jingsiew ia ki consultant ka kham heh wat ia ki ophisar ka sorkar jylla. Halor kane, u Conrad ula ong ba ka jingsiew ka shong katkum ka kam kaba ki trei bad katba u myntri rangbah u dang jubab, u Dr. Mukul ula ieng ban pyrshah ba u la shu jubab ia kajuh kaba la dep, hynrei u Conrad ula ong ba u hap ban batai khnang ban ioh ia ka jingshai.
Shwa ia kane, u myntri rangbah u Conrad ula ong ba ki don 39 ngut ki consultant bad ki consultancy 69 nabar ha ka jylla bad ia ka pisa la shim na ka projek ba la mang.
Ia kane ka jingkylli la wanrah u MLA ka Mawlai u bah Brightstarwell Marbaniang ha iing dorbar mynta ka sngi. U bah Brightstarwell ula buh jingkylli balei ka sorkar ka wanrah ia ki briew namar hato ki samla na kane ka jylla kim bit lane ka dei ia ka sorkar ban ai jinghikai ia ki.
U Myntri Rangbah ula ong ba ha kane ka juk iakop, ka donkam ia ki briew kiba tbit bha ha ka kam ban pynkhreh ia ki projek kiba jwat bha wat ki ophisar ki shem jingeh.
U la ong ba ha ki 7 snem ba la leit, la lah ban wanrah 13 tylli ki kompeni nabar ri kum ka ADB, JICA, World Bank bad kiwei ban bei pisa ha ka jylla lyngba ka jingdon ki consultant bad ka jylla ka la ioh 7700 klur tyngka na kine na ka bynta ki kam pynroi.
U Conrad ula kubur ba donkam ban pyntbit ia ki samla na ka jylla ba kin lah ban trei hi ia kum kane ka kam, kaba iaryngkat bad ka pyrthei bad ka ri bad, ia kane la sdang ban leh katba dang ap ia ki samla na la ka jylla kiba shah pyntbit, ka sorkar kam lah ban ap ia ka jingdonkam ba kyrkieh bad ka hap ban pain shwa ia ki briew nabar kiba la tbit ha kane ka kam.
U myntri rangbah u la ong ba ka jingsiew ia ki consultant la mang shi percent na ka projek kaba long katkum ka kyndon bad kam don kano kano ka jingkit ha ka sorkar.
Shuh shuh u myntri rangbah u la ong bah aba sdang ki don tang 3 percent ki samla na kane ka jylla hynrei mynta ka jingdon ki samla kiba trei ha kine ki consultant ka la kiew sha 30 percent.
Phi don ban ong eiei?