Iamir jingmut u MDC ka Mawlai bad ki Nongkitkam Shnong

Shillong, 17 Lber:
U MDC ka Mawlai Bah PT Sawkmie, ula hynne ka step u la iamir jingmit bad ki Nongkitkam Shnong jong ki Dong bapher bapher ka Mawlai Pyllun ban iamir jingmut halor ki kam pynroi pyn par hapoh ki Shnong ki Thaw.
Ki Nongkitkam Shnong bapher bapher kiba kynthup naduh ki Rangbah Shnong, ki Secretary, ki Rangbah Dong, ki Officer Bearer bad ki Executive Member jong ki Dorbar Shnong ki la wan ban iashim bynta ha kane ka jingkhot jong u MDC na ka bynta ban iakren ia ka roi ka par. U Bah Process ula lum ia kane ka jingialang ban ioh ia ka jingiatreilang na ka bynta ki kam pynroi kiba dei na ka bynta ki shnong ki thaw. U Bah Process u la ong “ka elekshon kala kut, ka politics kala kut, to ngin iaklet ia kiei kiba la dep bad mynta ngin iatreilang”.
“Kumba shiphew snem mynshuwa phi la ju iatreilang bad nga mynba nga dang long u MLA, to mynta ngin iatrei biang khnang ba ki paidbah kin ioh ia ka jingmyntoi”, u la ong. U ong, ba mynta ba ula ioh long Nongmihkhmat biang, na ka liang jong u un sa buddien biang ia ki skhim kiba dang sahteng, kiba ym pat lah ban pyndep haduh mynta mynne. U Bah Process ula ong ruh ba un nang trei shitom ban buh jingtyrwa ia ki skhim thymmai kaba ki shnong ki pyntip sha u kum u Nongmihkhmat. U ong, kumba ki paidbah kila ai jingshaniah, na ka liang jong u, un nang trei shitom arshah laishah khnang ba ka Constituency kan phyrnai biang kumba long ha ki por shiphew snem ka jinglong MLA jong u.