Shillong, 17 Rymphang:
Shi taiew shuwa ban long ka elekshon MDC, ka lyer lekshon ka la beh jur ha kylleng ki konstitwensi, katkum ka jingioh lum khubor la ioh jingtip ba ka Shella konstitwensi ka dei kawei na ki konstitwensi kaba la shongshit bha. Ha katei ka konstitwensi la ong ba ka jingiakhun ka kham shongshit hapdeng u kyrtong ka seng UDP u ba dei ruh u MDC ka Shella u bah Teinwell dkhar bad u kyrtong shimet uba la shah pynduh tiket ha ka seng Congress u bah Bantyngshain Rynga, uba ieng ha ka shap jong ka sngi. U kyrtong ka seng Congress u bah Pynthymmaibor Chyne la ong ba shuwa ba un mih ban ia khun u dei u kyrtong uba la paw bha bad uba ki paidbah ki khmih lynti ba un lah ban pynliem ia ka UDP, hynrei tang hadien ba la pynbna ia ka tiket la ong ba ka la don bun ka jingkylla ha Shella Konstitwensi ha kaba ki la don ki nongialam bad ki nongkyrshan jong ka seng Congress kiba la leit ban ai jingkyrshan ia u ha kane ka kynti mynta, ym ia u kyrtong ka seng watla ki don hapoh ka seng.
Kham mynshuwa u bah Bantyngshain u la kam ba 3 pawa na ki Congress ki ai ka jingkyrshan ia u, bad ha ka jingleit twad jingmut u nongthohkhubor na ki katto katne ki unit ka Congress ha katei ka konstitwensi la shem ba ki don ki unit kiba la shah pynkylla noh ha kaba ia ka unit barim- ka congress kam ithuh shuh bad shuwa ka MDC elekshon la thaw pat da ka unit kaba thymmai. Kiba bun ki dkhot ka Congress ki bym shym la kwah ban pynpaw ialade namar ka jingduh nong kaba shadien ki la iathuh ba ia mynta ka kyrteng jong ki kan don beit bad ka seng katba ka jingkyrshan bad ka vote kin leit ban ai sha u bah Pynthymmai, ki nongialam unit ruh da ka jingbuhrieh kyrteng ki la pynpaw ba kin ym mih madan ban ialap na ka bynta u kyrtong ka Congress hynrei kin ialap sop sop napoh napoh ia u kyrtong shimet.
Lah ban kdew ba ka Congress ha Shella ka la kam ba u bah Leston Wanswet u President ka Block congress Shella bad u bah Jrop S Nongkhlaw u working President ki don ha ka liang ka seng ban kyrshan ia u kyrtong ba ka seng ka la pynieng hynrei katkum ka jingioh lum khubor la ioh jingtip ba watla kam dei ka kam kaba paw hynrei napoh napoh u Working President bah J S nongkhlaw u kyrshan ia u bah Bantyngshain Rynga bad ka la don ka jingbthah ia ki briew jong u ban iaid shakhmat ban kyrshan ia u kyrtong shimet.
Haba phai sha ka liang ka UDP ruh ki don katto katne ngut kiba ia mih bad don ruh kiba dang ia rung thymmai bad ha katei ka seng kam da iohi eh ba kan don bun ka jingkylla, tangba ka jingduhnong khyndiat ia ka UDP ka long ba ki don kito ki jaka kiba u MLA ka Shella u bah donkupar Roy u la khlain bha ha ka elekshon MLA ba la dep bad mynta kitei ki jaka kim hap shuh hapoh ka Shella Konstitwensi ha ka MDC.
Ha Shella konstitwensi ki la don 4 ngut ki kyrtong ki ban iaireng u Bah T.Dkharka UDP, u bah Bantyngshain Rynga u kyrtong shimet, u bah Pyndapbor Saibon u kyrtong ka KHNAM bad u bah pynthymmaibor Chyne u kyrtong ka Congress.
Phi don ban ong eiei?