Ialap elekshon ka Congress ha Raliang

Shillong,25 Lber:
Ka Congress ka la pynlong ia ka jingialang ialap elekshon ha ka 24 tarik mynta u bnai ha Raliang, West Jaintia hills ha katei ka jingialap elekshon la don u kyrtong ka congress u Ma Vincent Pala, u bah john F Kharshiing uba la shah pynduh tiket ha ka Congress, uba dang shu shimti shen kum u Vice President ka MPCC.Haba ai jingkren u bah john u la ong ba ka seng Congress ka long kum ka kynhun ialeh Football, bad bun ki player kiba tbit bad kiba long ki ‘all rounder’ teng teng u player uba tbit uba ia leh shakhmat u hap ban khih sha dien kum u defender lane kum u mid-field lane kum u ba mareh na sha ‘right wing’ ne ‘left-wing’. U la pynkynmaw ruh ba teng teng ki player kiba paw ha ka pyrthei kum u ‘maradona’ u ‘messi’ ki shong kum ki reserve bad ki ai lad ia kiwei pat bad ki mih ha ki minit shwa ban wai. U la ong ba ka kam shakri paidbah kam dei tang lyngba kawei ka kam hynrei ki don bun ki rukom shakri paidbah.
U la ong ba ki paidbah ki don ka hok ban jied ia uba ki sngewbit, hynrei u la kyrpad ia ki ban pyndep ia ka hok ban leit thep vote ym dei ban pynlehnoh ei ia ka hok ban jied. U la ong ba ha ki Ri kiba la shai ki shah ot ka bording bad ka um haba ki pep ban thep vote, katba ha Ri India ki paidbah ki ioh ia ka jinglaitluid ban jied katba ki mon.
Kiwei kiwei kiba la kren bad kiba la iadon lang ki long u Bah G Sten, President, WJHD Congress Committee, u Bah Winning G Sungoh, MDC, Mokaiaw, u Bah Rio Sten, MDC, Borato, u Bah Bhawan Chyrmang, Ex-MDC, bad bun kiwei kiwei bad la pyniaid ia ka jingialang da u Bah B Dkhar, Rangbah Shnong, Raliang.