U Rahul Gandhi President jong ka seng Congress, ula ialam ia ka jingiaid paidbah ha ka nongbah Delhi, kum ka jingsngew pyrshah ia ka jingshah weng kam U Director jong ka Central Bureau of Investigation (CBI), U Alok Verma. “U myntri rangbahduh, ula pynjot lut ia baroh ki tnat sorkar ha ka Ri, lada dei ia ka CBI, lada dei ia ka elekshon komishon, hynrei u thombor lut ia baroh ki tnat sorkar bad kitei ki jingjia, ki don tang kawei ka jubab bad kata ka long Chowkidar chor hai. U buh ia ka pisa kaba T.30,000 hajar klur ha pla jong U Anil Ambani” ong U Rahul. Ha katei ka jingiaid paidbah sha ka ophis ba heh duh jong ka CBI, la synran ia U Rahul, da ki nongialam ba rangbah jong ka seng Congress, kiba dawa ba U Modi, u dei ban pan map mardor.
U Rahul Gandhi, uba ieng ha kali ki pulit, ha New Delhi.
U Rajnath Singh, myntri kam poh iing jong ka ri, ula kynthoh ia katei ka jingiaid paidbah, da kaba ong “Ka Congress, kam don shuh ia ki ishu paidbah bad kumta ka rah, da kine ki mat, ki bym don jingmut eiei ruh em. Ngi dei ban ap ia ka jingtohkit kan ong kumno”.
Uwei na ki nongrep na Madhya Pradesh, uba shong hapoh ruh, kaba pyni nuksa ia ka jingshah knieh bor U Director ka CBI
Na ka liang jong ka Supreme Court, mynta ka sngi, ka la bthah ia ka Central Vigilance Commission (CVC), ba kan pyndep ia ka jingtohkit pyrshah ia U Verma bad U Rakesh Asthana, uba dei U Deputy Director hapoh ar taiew. Katei ka dei ka rai, kaba la shim da ki lai ngut ki nongbishar, ba la khlieh da U Ranjan Gogoi, Chief Justice.
Ha katei ka jing ia iaid paidbah, U Rahul, ula shah kem ialade ha ki pulit, hadien ba ula leit tur sha ophis jong ka CBI ha New Delhi, ha kaba la leit rah ia U Rahul ha ka thanat ki pulit ha Lodhi Colony.
Kham hadien la pyllait noh ia U Rahul, na katei ka jingshah kem lane ka jingshah set phatok hi jongu ialade.