Ialam u Conrad ia ka kynhun GHADC sha u Jaitley

Shillong, 14 Nohprah:
U MP ka Tura u Conrad K Sangma, u la ialam ia ka kynhun ki MDC ka Garo Hills Autonomous District Council bad nalor u Thomas A Sangma u MP barim ban iakynduh ia u myntri pla tyngka ka ri u Arun Jaitley bad ia u myntri ka DoNER u Dr Jitendra Singh ban iakren ia ka jingpyntrei-kam ia ka pisa ba la ai ka sorkar pdeng ia ki district council.
Katkum ka kyrwoh khubor, ha kane ka jingiakynduh ki la pynshai hakhmat u Arun Jaitley ia ka jingtreikam ka GHADC bad ruh ia ka jingpyntreikam ia ka Special Assistance ka GHADC.
Ki la pynsngew ruh ha u myntri ka tnad pla tyngka iaka jingdonkam ban bei pisa shuh ban pynkhlain ia ka GHADC.
Ha kajuh ka por, ka la pynsngew ia ka jingktah ka jingpynduh ia ka pisa T. 1000 bad T. 500 ha kane ka jylla khamtam ha kine ki sngi ba la jan ka aiom lehkmen Khrismas ha kane ka jylla ba bun ki Khristan bad kyntu ia ka sorkar pdeng ba kan leh eiei ban pynlait ia ki paidbah na ka jingkynduh jingeh na ka jingpynduh pisa.
Ha kane ka jingiakynduh, na ka liang u Myntri tnad pla tyngka, u la kular ban leh ia kaba donkam ban pynthikna ba ki paidbah kin lait na ka jingeh ha kane ka aiom khrismas.
Kane ka kynhun ka la iakynduh ruh ia u myntri ka tnad DoNER u Dr. Jitendra Singh kiba la pynsngew ia ka jingeh halor ka jingkyrduh pisa ha kane ka aiom Khristmas.