Ialam bakla ka sorkar ia ki nonghikai ban phah ialeh TET

Shillong, 15 Iaiong:
Ka SSA-RMSA Teachers of India (SSA-RMSATI) ha kane ka sngi Thohdieng ka la kynnoh ba ka sorkar jylla ka la ialam bakla ia ki paidbah haba ka ong ba ka Teachers’ Eligibility Test (TET) ka dei ban hap  ialeh beit da baroh ki nonghikai skul katkum ka NCTE ban pynlong pura ia ki nong hikai SSA.
“Lada ngi leit kat kum ka jingong u Symbud Myntri Rangbah ka jylla u Dr. R. C Laloo uba la ong ban ialeh beit da baroh ki nonghikai skul ia ka TET, ka mut ba palat 50 lak ngut ki nonghikai skul ba hikai ha ki skul sorkar bad kane kam lah long”, la ong u Arvind Rana u president SSA-RMSATI haba kren mynta ka sngi, sha ki nongthoh khubor.
U la ong ba katkum ka kyndon ka NCTE ha u snem 2010 bad hadien ba la pynkylla ha u snem 2011, ki nonghikai kiba la thung ha shwa u snem 2010-11 la pynlait na ka jingialeh ia ka TET katkum ka Para 5.
“Ka sorkar pdeng ka la ai jingiarap 90 percent ha kaba ka sorkar jylla kan ai tang 10 percent kum ka kyndon ban thung ia ki nonghikai ba pura” u la ong.
Ki don 12, 841 ngut ki nonghikai SSA ha lower primary bad upper primary schools  ha ka jylla da kaba dawa ban thung kam pura noh ia ki. “Lada ka sorkar pdeng ka la ai pisa haduh 90 percent na ka 100 percent ia ka jylla, balei ka eh ia ka sorkar ban thung pura ia ki nonghikai”, u la ong.
Ka seng ka la byrthen ba lada ka sorkar kam pynbeit ia ki jingdkoh ha ka jingthung ia ki nonghikai SSA, kin hap leit sha iing Kashari.
“Lada ka sorkar kam lah ban pynbeit ia ki jingbakla ban thung kam pura ia ki nonghikai SSA, ngin hap ban leit sha iing Kashari”, u la ong.
U la ong ba ka Meghalaya ka dei kawei na ki jylla kiba la pynkhein ia ka kyndon ka Sarva Shiksha Abhiyan (SSA) bad ka Right to Education (RTE) Act, 2009 namar ba kam pat thung pura ia ki nonghikai SSA namar ba ki dang sah haduh mynta kum ki nonghikai kontrak.
U la ong ba un leit ban iashim bynta ha ka jingialang jong ka Meghalaya Sarva Shiksha Abhiyan School Association ha Jingkieng Nonthymmai ha ka sngi Saitjain ba la khmih lynti ban wan iashim bynta 5000 ngut ki nonghikai SSA.
“Ia ki nonghikai SSA dei ban thung pura noh ryngkat ka jingsiew kaba biang”, u la ong.
U la ong ba ia ki nonghikai SSA la thung da ka  SSA-State Mission Authority, ym da ki School Managing Committee (SMC).
“Ki SMC ki shu peit katkum ka kyndon ka RTE Act, 2009,” u la ong.