Shillong: Ka kur Shangpliang ka la ju pynlong ia ki jingialang ha la ki jong ki jong ki thaiñ ha ka jylla kata ha la ka jong ka jong ka kpoh, hynrei mynta ka sngi ha ka sien kaba nyngkong eh ki paid jong ka Kur Shangpliang ki la iakynduh lang ha ka shnong Lyngiong, kaba hap hapoh jong ka Lyngiong Syiemship bad ia kane ka jingiakynduhlang ha kane sngi Thohdieng la lamkhmat bad pynlong da ki Rangbah ka Kur Shangpliang kiba shong ba sah ha Lyngiong.
Nalor ki ki riew rangbah, longkmie, samla bad ki hep kiba rit na ka thaiñ Lyngiong, la wan iashim bynta lang ha kane ka jingialang da ki Rangbah bad ki longkmie na ka thaiñ Mawsynram, Mawthawpdah (Mawkyrwat), Sohra, Lawbah bad kiwei.
Ha kane ka sngi la wanrah ia ka jingmait phang jong kane ka jingialang da u Chairman Bah Marcus Shangpliang, kumjuh u Bah Moonstar Shangpliang, kiba dei ki nongkitkam jong ka Kur Shangpliang Lyngiong. Hadien kane la ioh ia ka jingkren lyngkot na u bah Commander Shangpliang uba la wan mihkhmat ryngkat bad kiwei pat ki riew rangbah n aka thain Mawthawpdah.
La ioh ruh ia ka jingkren na u Bah A. Shangpliang, uba dei uwei na ki Rangbah Kur Shangpliang jong ka thaiñ Sohra uba batai halor ka jingiaid shaphrang jong ka kur Shangpliang ha ka thaiñ Sohra bad uba la kyrpad ruh ia ki para nongialam kur Shangpliang ban thaw noh ia ki Unit ha manla ki jaka. La ioh ruh ia ka jingkren na i kong Jerina, Kong Mebirda Shangpliang bad kiwei kiba la pynpaw ia ka jingsngewkmen kaba khraw halor kane ka jingiakynduh lang ban ia ithuh ithaw iwei ia iwei, ban iakit iabah ha ka khia ka shon bad kiwei ki mat jingdonkam.
Ha kane ka sngi la thaw ruh ia ka Adhoc Committee jong ka Kur Shangpliang ha kaba la thung Chairman ia u Bah A. Shangpliang, Secretary Bah Commander Shangpliang, Treasurer Bah Moonstar Shangpliang bad kiwei kum ki dkhot hapoh kane ka komiti.
Ha ka juh ka por ka adhoc committee ka la bthah ia baroh ki nongialam kur ha ki jaka bapher bapher ha ka jylla la ka long ha Ri Bhoi, Jaiñtia, East bad West Khasi Hill ruh kumjuh ban thaw noh ia ki Unit khnang ba yn lah ban wanrah ia ka jingiatylli jong ka kur Shangpliang baroh kawei.
Ha kane ka sngi la bthah ruh ia ki Rangbah kur Shangpliang kiba la poi ha kane ka jingialang ba kin shimkhia ban pynlong noh ia ki jingialang ha la ki jong ki jong ki thaiñ bad ban jied ruh ia ki nongkitkam.
Nalor kane la aiti ruh ha ka adhoc committee ban iapyrkhat ban sdang ban pyntyllun ia ka kam ha kaba iadei bad ka kur. La pynshongkun shuh shuh ia kane ka sngi da ka jingshad na u samla Wanbet Shangpliang bad kiwei kiwei ki samla bad khynnah bad la ioh ia ka jingkren ai khublei na u Bah Hering Shangpliang.
Phi don ban ong eiei?