Iakynduh heh AICC U bah Lapang

Shillong, 28 Naitung:
U bah DD Lapang, President jong ka Megha laya Pradesh Congress Committee, uba long ruh u lamphang jong ka North East Congress Coordination Committee (NECCC), ula leit sha ka jingialang jong ki President jong ki nongialam Congress ba pher bapher, ha kaba la don lang ruh u myntri ka sorkar India, U Jairam Ramesh, kaba la long hynnin ka sngi ha New Delhi bad ka jingialang, ka dei ban iakren halor ka jingpyntreikam ia ka National Food Security Ordinance.
U Rahul Gandhi, Vice President jong ka seng Congress, ula kren ia katei ka skhim, na ka bynta ban pyntreikam ia ka bha ka miat bad ka roi ka par jong ki paidbah ha ka Ri.
U bah Lapang, ha ka jingkren jongu, ula ai jingiaroh ia ka sorkar India, ha ka jingialam ka Sonia Gandhi bad U Manmohan Singh bad U Rahul Gandhi Vice President, ba ki la wan rah ia katei ka skhim na ka bynta ka jingmyntoi jong u paidbah jong ka Ri.
U la pynpaw ruh ia ka jingsngewnguh ba ka sorkar India, ka la mynjur ban pei tyngka, na bynta ka jinglut jingsep, halor ka jingpyntreikam ia katei ka skhim. U bah Lapang, u iathuh ba ki jylla jong ka dong shatei Lam Mihngi, ki dei kiba shitom bha ha ka leit ka wan, ka kit ka bah bad kumta u kwah ba ka sorkar India, kan thaw ia ki lad, na ka bynta ban lah ban nym buh jingeh ia ki paidbah. U bah Lapang, u ai jingmut ruh ia ka sorkar India, ba ka dei ban pynbeit ia ki kyrteng jong kiba duk, kiba don ha ka thup bpl, katba kum ka jinglong kaba mynta, ba kito kiba dei hok, kin ioh jingmyntoi na katei ka skhim, ong ka khubor na U bah Manbor S Warjri, General Secretery ba peit ia ki kam pyllait khubor jongka MPCC.