Shillong, 2 Naitung:
Ka kynhun ki Khlieh Nongsynshar na ka thain Hima Sohra, Saitsohpen, Mawsmai bad kiwei kiwei, ba la ialam da u Bah John F Kharshiing, Chairman, The Grand Council of Chiefs of Meghalaya, Chairman, Ka Dorbar ki Khlieh Nongsynshar Ka Ri Hynniewtrep, bad Spokesperson, Federation of Khasi States, ki la ia kynduh ia u Bah WMS Pariat, IAS, Chief Secretary, Sorkar Meghalaya, hapoh office treikam jong u mynta ka sngi, ha Secretariat, Shillong ban ia kren halor ka Sohra Ecological Project kaba la trei mynta la palat ar snem na ka bynta ki 45 tylli ki shnong ha ka thain Sohra baroh kawei.
Na ka liang ki Khlieh Nongsynshar ka thain Sohra, u Bah E R Sawian, Secretary, Synjuk Ki Khlieh Nongsynshar Thain Sohra, u la ai ia ka dorkhas ha u Chief Secretary, Sorkar Meghalaya, kaba la kyntu ia ka Sorkar ban nym pynduh ia katei ka project, bad la kyrpad ruh ban ai jingshai halor katei ka lawei jong katei ka project kaba donkam bha na ka bynta ka thain Sohra.
Na ka liang u Bah John F Kharshing, Chairman, Ka Dorbar Ki Khlieh Nongsynshar ka Ri Hynniewtrep, u la ai jingmut bad tyrwa sha ka Sorkar ban pynlong ia ka jingiakynduh lang jong ki officer katei ka project bad ki nongialam shnong khnang ba ki paidbah kin ioh jingshai halor katei ka kam.
Hadien ka jingiakren kaba sani bha halor katei ka project na ka liang u Bah WMS Pariat, IAS, Chief Secretary, Sorkar Meghalaya, u la kren skhem bad kren shai ba ka project ka nym sangeh bad ym lah ban rah ia katei ka project shawei, u la ong ba ha ka jingshisha kan dang iai bteng, bad lehse lah ban nang pynbha shuh shuh ia katei ka project da kaba ia mir lang ki jingthmu jong kiwei ki tnad sorkar, bad halor kane u la kyrpad ia ki Khlieh Nongsynshar ban lum thup ia ki jingmyntoi lane ki jingduna kiba ki shem lada don kiba la mih na katei ka project kum shibynta ban ai jingtip sha ka ki officer bad ka Sorkar halor ka jingseisoh jong katei ka project bad ban wanrah ka jingiatrei lang hapdeng ka tnad Sorkar bad ki paidbah kiba dei kiba ioh ia katei ka jingmyntoi.
U Chief Secretary, Sorkar Meghalaya u la mynjur ruh ia ka jingai jingmut ban bthah ia ka tnad bad ki officer kiba dei peit ia katei ka project ban pynlong ia ka jingiakynduh lang ban ia kren halor ki kam kiba la dep trei bad kiban sa dang trei (review) ha kaba yn ia donlang ki officer tnad Sorkar bad ki Khlieh Nongsynshar kiba hap ha katei ka project ha ryngkat ki officer Soil, Tourism bad kiwei kiwei khnang ban wanrah ia ka jingiaid beit iaid ryntih ka rukom treikam jong katei ka project.
Kiba la ia kren bad kiba la ia don lang ki long u Bah R Liam, Secretary, Pdengshnong, Sohra Syiemship, Bah R Rymbai, Sordar, Elaka Saitsohpen, u Bah B Sohklet, Secretary Elaka Mawsmai, u Bah E.R Sawian, Secretary, Synjuk Ki Khlieh Nongsynshar thain Sohra bad u Bah J Khyriemmujat, Rangbah Shnong, Nongmadan
Phi don ban ong eiei?