Iakhun khatduh mynta, hapdeng ka Meghalaya bad Mizoram ha ka U-23 men’s Col CK Nayudu Trophy

Shillong:Ha ka jingiakhun hapdeng ka Meghalaya bad ka Mizoram jong ka lympung U-23 men’s Col CK Nayudu Trophy ba la bteng sha ka sngi ba-lai, u Bipin Kumar Ray hynnin ka sngi u la ioh ban pynkhyllem hynriew ngut ki wicket jong ka Mizoram ba la ialeh ha Nadiad, Gujarat.

Da kaba pynlut 46.4 over, ka Mizoram ka la shah pynkut noh ha ka inning kaba ar da kaba kamai 232 run bad da kumne ka Meghalaya ka donkam 194 run ban ioh ia ka jingjop ha kaba hynnin ka sngi ka lah kamai shuwa 30/2 ha kaba kan bteng biang ban iakhun mynta ka sngi.
Ha kaba sdang jong kane ka jingiakhun, ka Meghalaya ka la jop ia ka toss myn ha ka sngi u blei bad ka la jied ban kawang bad ap bol shuwa. Ka la lah ban pynkut ia ka pali tied jong ka Mizoram da 220 run bad ka la jubab da 259, kumta ha ka inning kaba nyngkong ka Meghalaya ka la lam khmat ia ka jinglehkai da 39 run.

Ha ka inning kaba nyngkong jong ka Mizoram, u Aryan Borah u la ioh ban weng saw ngut ki nongtied ka Mizoram da 34 run ha ki 16 over. Nalor jong u kiba la ioh shim wicket ha katei ka inning ki kynthup ia u Bipin (2/23 ha ki 8 over), PM Santhosh (2/25 ha ki 10 over), Manish Sharma (1/54 ha ki 20 over) bad u Abhishek Kumar (1/64 ha ki 13 over).
Ha ka jingai jubab, u Kevin Christopher u dei uba la tied bun da 88 run na ki 188 bol kiba kynthup ia khatsaw tylli ki 4.
Ha katei ka kylla, u Kevin u la ioh ka jingkyr shan na u Kush Agarwal uba la kamai 64 run na ki 168 bol bad u la ioh ban thlieh phra tylli ki 4. Kitei ki shijur ki la ioh ban ianeh paralok hadien ba ka Meghalaya ka la duh lai ngut ki nongtied kiba hakhmat kiba la lah ban kamai bun eh tang 10 run marwei.

Ka jingianeh paralok jong ki la la long 156 run na ka bynta u wicket uba saw ha ki 56 tylli ki over.
U nongtied jong ka Mizoram u K. Vanrot linga uba la tied 67 ha ka inning kaba nyngkong, hynnin ka sngi u la kamai 101 run ha shuwa ba un hap noh ha ka bol jong u Bipin.

Nalor u Bipin, u Manish u la ioh 2/30 ha ki 20 over, Abhishek 1/23 ha ki 9 over bad u Santhosh 1/31 ha ki 9 over.
Ka jingiakhun mynta pat ka sngi kaba bteng sha ka sngi kaba saw, kan ym long kaba suk ia ka Meghalaya ha kaba ka dang sah sa 200 khlieh ei ei ban poi sha ka thong da kaba ioh tied khatduh, hadien ba ka la duh lypa ar ngut ki nongtied jong ka hynnin ka sngi kata u Nishanta Chakraborty bad u Bipin Kumar Ray.