|
Shillong: Ka kynhun ki seng jong ki samla pule na ki jylla ka dong mihngi ka India ba kynthup ia ka Assam, Meghalaya, Mizoram, Tripura, Manipur, Arunachal Pradesh, Nagaland ki la pynlong ia ka jingiakhih mynta ka sngi ha nongbah Guwahati ban pyrshah da kaba tyngeh ia ka jingthmu ka sorkar pdeng ban pdiang ia ka ain ban ai hok nongshong shnong ia ki Hindu, ki Sikh, bad kiwei ki jaitbynriew nabar ri ban wan sha India lyngba ka Citizen (Amendment) Bill (CAB) 2016, ka Foreigner (Amendment) Order 2015, Passport (Entry in to India) Notification 2015 bad ka visa. Ha ka lama ka North East Students’ Organization (NESO) ki la pynlong mynta ka sngi bad kin sa pynpur sha kiwei ki jaka jong kane ka thain bad kumjuh sha Delhi. Ka NESO – ka kynthup ia ka Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) bad ka All Arunachal Pradesh Students’ Union (AAPSU) ki pyrshah jur ia kane ka Bill ka sorkar pdeng namar ba kan pynjah syndon ia ki trai jaka kane ka thain lada ailad ia ki Hindu, ki Sikh, ki Jain, Parsi, kiba nabar ri ban wan long nongshong shnong ka India. Ka jingiaid paidbah la pynlong ha Guwahati kaba la sakhi ia ka jingwan iashim bynta kine ki seng. Kine ki seng ki la maham ia ka sorkar pdeng ba kin pynjur ia ka jingiakhih lada kan pdiang ia ka Citizenship (Amendment) Bill. Ki la dawa ba ka Joint Parliamentary Committee (JPC) ka dei ban pule bniah bha ia ka jinglong jingman ka thain bad ban leit jngoh ia kane ka thain baroh kawei shwa ba kan ai ia ka kaiphod. Ka JPC ka la wan jngoh dang shen ia ka Assam bad ia ka Meghalaya. Ka NESO kan pynkhreh ruh ia ki prokram iakhih ban long naduh ka 30 tarik Nohprah ha baroh ki jylla ka dong mihngi. Hadien kane, kin sa leit ban pynlong ia ka jingiaid paidbah ha nongbah New Delhi ha ka sngi ba sdang ka dorbar Parliament. Ki dkhot ka NESO kin leit ban iakynduh ia ki myntri sorkar, ia ki MP jong ki jylla bapher bapher kane ka thain ba ki dei ban dawa ban pynsangeh ia kane ka Citizenship Bill. Ka NESO ka la ong ba ka jingpynmkih ka sorkar ia ka hukum, ki Rule, ia kane ka Bill bad ka Visa ia ki Hindu ba wan phet shnong kan buh ia ka jingma kaba shyrkhei ia ka thain na ka jingshah tyllep. Ka NESO ka la dawa ba ka jingpynkhreh ia ka National Register of Citizen (NRC) dei ban pyntreikam ha baroh ki jylla ka dong mihngi kumba leh ha Assam. “Ki sorkar jylla ki dei ban pynkhreh ban pyrshah ia kane ka Bill hadien ba la iakren bad ki seng bapher bapher ha ki jylla. Ka dei ban leh ia kane mardor,” la ong u chairman ka NESO u Samuel Jyrwa. “Ka Tripura ka la duh ia ki trai shnong na ka jingwan buhai shnong ki briew na Bangladesh bad kiwei ki jylla ki la don hapdeng ka jingma”, la maham u chairman ka NESO. |