Ïakhih ka NESO, ba bteng ka ia umsnam ha Manipur

Shillong:Ka kynhun ki sengbhalang hapoh ka lama jong ka North East Students’ Organisation (NESO) ha ka sngi Palei, ka la pynlong ïa ka jingïakhih da kaba shong kyllaiñ myngngor ha baroh ki Jylla jong ka thaiñ Shatei Lam Mihngi.

Ïa kane ka jingïakhih la pynlong kum ka dak ban pynrem jur ïa ka jingbym lah ka Sorkar Pdeng ban leh eiei ha kaban pynkut noh ïa ki kam ïa umsnam kaba la jia ha Manipur kaba la neh mynta la 6 bnai tam.
Ïa kane ka jing ïakhih ha nongbah Shillong la pynlong ha u mot ba shi rynïeng jong u Tirot Sing Syiem uba don ha Laitumkhrah ha kaba bun ngut ki dkhot jong ka NESO kila wan ban ïashimbynta.

Kane ka jingïakhih ka NESO ka long ruh ban pynpaw ïa ka jingsngewkhia halor ka jinglong jingman ha ka Jylla Manipur, khamtam haba la 6 bnai mynta ka la ïaid hynrei ym shym la ïohi ïa kino kino ki dak ki shin ba ka jinglong jingman kan jai jai noh.

Ki nongïashim bynta kiba kynthup ïa ki nongïalam bad ki dkhot jong ka KSU, JSU, GSU, FKJGP, HNYF, RBYF, HITO, Shillong Manipuri Students’ Union, Kuki Students’ Organisation Shillong, Naga Students’ Union Shillong, Shillong Socio-Cultural Assamese Students’ Association,Mizo Students’ Union Shillong, Twipra Students’ Federation Shillong, Arunachal Students Union Shillong, Mara Students’ Organisation bad Lai Students’ Association.