Ïakhih ka NEHUSU, bym pynbiang bus, ïa ki samla ïaleh eksam

Shillong:Ka North Eastern Hill University Students’ Union (NEHU SU) ka la pynlong ïa ka jingïakhih pyrshah halor ka jingbym lah ki bor pynïaid ka NEHU ban pynbiang ïa ki bos na ka bynta ki samla pule, kiba hap ïaleh ïa ki eksam, kaba la wanrah shibun ki jingeh ïa ki.

Kane ka jingïa khih kaba la neh shikynta eiei, la pynkut noh hadien ba u Assistant Registrar in-Charge Transport u Bah Ivan Lyngdoh ula kular ban pyntreikam ïa ka jingdawa ba la buh hakhmat da ka Union.
“U Bah Ivan Lyngdoh ula panmab na ki samla pule halor ka jingeh ba ki mad bad pynbna ba nangne shakhmat, yn sa pynbiang noh ïa ki bus katkum ka jingdawa ka NEHUSU,” pyntip u Finance Secretary ka Union u Mandor Lyngdoh ha ka kyrwoh ba la ai hadien ka jingïakhih.

Une u samla pule ula pyntip ba ka Union ka la dawa ruh ban pynbiang ïa ki bus ha ka sngi kut taïew na ka bynta ka jingsuk ki samla pule khamtam kiba sah hostel ba kin lah ban leit shane shatai na ka campus ha ki sngi kut taïew.

“Ki nongsah hostel ruh ki siew ïa kajuh ka bai bus kum ki samla ba pule ba sah shabar ka campus, ki ruh ki dei ban ïoh ïa ki bus ba kin leit ki wan hapoh ka Nongbah,” ula bynrap.