Shillong: Ka Sawmer bad ka Rangdajied United FC ki la iakhaid khlem lah ban thep kol ha ka kylla baar ka Shillong Premier League ka SSA myn hynnin ka sngi ha madan JN Stadium Polo.
Ka jingiakhaid ka mut ba kine ki hap ban iasam mar shi point na kane ka jingialehkai.
Ha ka jingialehkai Second Division ka Nongkseh ka la shah pynliem da 2-0 ha ka Lumshyiap. Ia kine ki ar kol na ka Lumshyiap la thep da u Kalbrert Malieh ha ka 45 bad 90minit. Ha ka jingialehkai Third Division, ka Mawkriah west ka la pynliem noh da 1-0 ia ka Qualapatty. Ia kane ka kol namjop na ka Mawkhriah la thep da u J Nongbri ha ka 35 minit jong ka kylla step.
Ha kawei pat ka jingiakhun ka Umsohsun ka la pynliem ia ka Madanryting da 2-0 kol. Ka nam jop jong ka Unsohsun ka la wan lyngba ki ar kol ba la thep da u Gladness Swett ha ka 47 bad 56 minit. Kumjuh ka Umpling ka la pynliem ia ka Gorkha da 2-0. Ia kine ki ar kol na ka Umpling la thep da u Jerrymy Jyrwa ha ka 37 bad 65 minit ban pynliem Gorkha da 2-0 kol.