Shillong: Ka Malki bad ka Sawmer ki la hap ban iasam mar shi point hadien ba ki la iakhaid 2-2 kol ha ka jingiakhun jong ka lympung Shillong Premier League ka SSA kaba long ha kane ka sngi Saitjain ha madan Polo, Shillong.
Ka jingbakla u nongapkol ka Malki u Sbing Chyrmang ha ka 23 minit, ka la pyllong ia ka Sawmer ban ioh pynkhih jar nyngkong ha kane ka jingiakhun hynrei ka la lah ban khyllie biang ia kaba la shah thep ha k kyllamiet. Ka Malki kala ioh ban thep ar kol ha ka kyllamiet lyngba u Lakhon Surong (47′) bad u Primrose Lawat (70′).
Hynrei ka Sawmer ka la ioh ban pynphai kylla sa kawei lyngba u Gamelial Kharlyngdoh ha ka 73 minit ban pyniakhaid ia ka jingialehkai.
Ha ka jingshisha, lada ym dei ba ka ioh off side, ka Malki ka la dei ban jop kaba la ioh ha ka khyllipmat kaban kut artad ka jingialehkai.
Ka jingiakhaid, ka la pyllong ia ka Malki ban don ha ka kyrdan ba san, kham halor ka Nangkiew Irat kaba don ha ka kyrdan ba hynriew. Baroh ar kine ki ia khur mar 4 point hynrei ka Malki ka la kham tam ka jingioh thep kol.