Shillong: Ka Langsning FC bad ka Sawmer ki la iasam mar shi point ha ka jingiakhun ka Shillong Premier League 2018 ka SSA kaba la long myn hynnin ka sngi Balang ha madan Polo, Shillong. Ka jingiakhun ka la kut noh ha ka jingiakhaid khlem don ba lah ban thep kol.
Ka Langsning FC ba bat ia ka kyrdan ba hakhlieh duh ka la mad ka jingiakhaid ha ka sien ba nyngkong eh ha ka jingiakhun mynta ka sngi pyrshah ia ka Sawmer.
Ha ka jingiakhun baroh ar tyllli ki kynhun ki la pyrshang bor bah hynrei ki kabu ba ki ioh ki la shu sepei haba kim lah ban thep kol ha ki 90 minit ka por ba la buh ban ialehkai bad ka jingialehkai ka la kut khlem don mano mano ba ioh ban thep kol.
Da kane ka jingiakhaid, ka Langsning ka la kamai 10 point na ki saw sien iakhun katba ka Sawmer ka la ioh ban kiew sha ka miej iakhein point ka SPL da shipoint na ki saw sien iakhun.
Ka jingiakhun mynta ka sngi ka jingialehkai ha ka 1st Division kan long hapdeng ka Nongrim Hills pyrshah ia ka Smit SC.