Shillong: Ka Langsning FC ka la ioh khur shi point na ka jingiakhun kaba satar bha bad ka Mohammedan Sporting ha ka lympung Second Division League ka Group C ba long mynta ka sngi ha Kolkata.
Ka jingialehkai ka la iakhaid 0-0 kol khlem don ba lah ban iathep kol ha baroh 90 minit.
U Coach ka Langsning u Bah Hering Shangpliang ula sei ia ki nongialehkai kumjuh kumba la pynialehkai pyrshah ia ka Jamshedpur FC.
U Donborlang Nongkynrih, Poibiang Pohshna bad u Ronnie Nongbri ki la ioh ban mih madan ha ka thup XI.
Da kane ka jingiakhaid, ka Langsning ka la kamai 8 point na ki san sien ka jingialehkai ha kaba ka jop ar sien, iakhaid ar sien, shah rem shisien.
Ka Mohammedan bad ka TRAU FC ki dang don ki jingialehkai shakhmat bad ka Langsning kan long kaba la pynkhreh ban ap ia ka jingmih.
Ka Langsning kan sa iakhun ia ka Mohammedan Sporting sa ha la iing ha ka sngi Thohdieng ha madan Jawaharlal Nehru Stadium por 4:00pm.