|
Shillong: Ka Chennai City bad ka Shillong Lajong ka la iakhaid khlem don ba lah ban thep kol ha ka jingiakhun kaba long ha ka Coimbatore jong ka lympung I-League. Ka dei ka jingialehkai ba khadduh ia ka Shillong Lajong shabar na la iing ha kane ka aiom.
Ha ka kyllastep, ka Chennai City ka la kham lah ban ialehkai bha ia ka Shillog Lajong khamtam na ka jingpynshad bol u kapten jongka, u Soosai Raj ha kaba u la ioh ban rah ia ka bol marwei haduh ban shu thep beit hynrei u la pynleh noh ei kha ma kha. Ha kane ka kylla, la iohi ba ka Lajong kam shym la lah ban thaw pyrthei namar ba kala shah noin beit hynrei ka la shu pyrshang ban iada ia la ka kol ban lait na kaba shah thep. Toi, ha ka jingshisha, ka Lajong lyngba u Samuel ha ka 19 minit ka la jan ioh ban thep ia ka kol hynrei kane ruh kam shym la lah ban pynurlong satia. Ki nongialehkai ka Chennai kum u Soosai Raj, Rakic bad u Joachim ki la pynking klong ia ki nongialehkai ka Lajong hynrei ynda la poi ha ki bak ka bol ka sangeh beit tden. Ha kane ka jingialehkai, ka Lajong ka la bujli da u Alen Deory ha ka 37 minit ha jaka u Kynsai Khongsit . Shwa ban wai ka kyllastep, ka Chennai ka la ioh ia ka lad sa ban shu thep hynrei la ioh noh u nongapkol ka Lajong u Nidhinlal ban pynlait im. Ha ka kyllamiet ruh ka Chennai City ka la bteng ban noin ia ka Lajong ha kaba ka la dei ban ioh ban thep ia ka kol hynrei ka la shem jingeh namar ka jingtbit u nongap bak bad kumjuh ki nongap kol. U Shaiborlang Kharpan ula mih bujli noh ha jaka u Abdoulaye Koffi ha ka 64 minit bad ha ka 67 ka la dei ban ioh thep kol hynrei ka lait noh sharud. U Soosai Raj ka Chennai u la ioh ia ka lad ha ka 73 minit ban thep hynrei la ioh ban pynlait im noh da u nongapkol ka Lajong. Haduh ban wai syndon ka jingialehkai, baroh ar liang kim shym la lah ban thaw pyrthei eiei bad ki la hap ban shu iasam mar shi point. Ka Lajong ka don ha ka kyrda basan da kaba kamai 18 point na ki 16 sien ialehkai bad kan hap ban wanphai sha la iing ban iakhun ia ka Aizawl FC ha ka 19 tarik mynta u bnai. |
