Iaid thuk thuk ka HSPDP ha Shillong ban dawa article  371

Shillong, 21 Nailur:
Ka HSPDP Youth Wing ka la pynlong ia ka jingiaid thuk thuk mynta ka sngi ha nongbah Shillong ban pynshai paidbah ia ka jingdawa ka seng ban wanrah ia ka Article 371 ha kane ka jylla ban iada ia ki trai jylla.
Ia kane ka jingiaid thuk thuk la ialam da u president ka HSPDP Youth Wing u bah Pyniaid Sing Syiem bad la ia bud da ki dkhot ka seng. Ka jingiaid la sdang na madan Nongthymmai bad la leit pynkut pat sha Laitkor hadien ba la iaid kylleng ka nongbah.
Ka HSPDP ka pyn long ia kane ka jingiaid thuk thuk shi bynta ban pynshai paidbah halor ka jingdonkam ba kin ai ia ka jingkyrshan ia kane ka jingdawa ka seng. U MLA ka HSPDP u Bah Ardent M Basaiawmoit un rah ruh ia kane ka mat hapoh ka iing dorbar ka jylla kaba dang iaid mynta bad ka seng ka la wer ia ki paidbah ban ai ia ka jingkyrshan ia kane ruh.
Ka seng Hynniew trep A’chik National Movement (HANM)  ka la pdiang ia kane ka jingdawa ka HSPDP bad u president jong ka u Bah Lamphrang Kharbani u la ong ba u kwah ban ai khublei ia ka HSPDP kaba shim ia kane ka mat kaba donkam ban dawa da ka Article 371 ban iada ia ki trai jylla.
Shwa ban iaid, u vice president ka HSPDP u Bah Ardent Basaiawmoit u la wan ban kren ha ki nongnia thuk thuk ban ai mynsiem ia ki. U Bah Ardent u la ong ba ka jingthmu ban rah ia kane ka long ban dawa na ka sorkar India ban ai da ka artikil 371 ban ai ia ka jingiada ba kyrpang ia ki trai jylla ha ka liang ka spah ka phew ba la ai mariang, ka riti dustur.