Iaid tap khmat ki pulit, kieng tiar siat sa ki pulit pyniaid kali

Shillong,15 Risaw:
Ki pulit ka nongbah Shillong, kiba iaid pahara da ki thuk thuk ki la iaid pahara ha kylleng ka nongbah ryngkat ka tap khmut tap khmat ha kaba la iohi ba ar ngut ha kawei ka thuk thuk ki la shong ryngkat ki tiar ialeh jong ki ha kaba kim shym la pyni wat tang ia ka dur khmat jong ki ruh. Kila tap ia ki khlieh bad ki dur khmat da ki jain iong bad ia ka khmat pat ki la deng da ki iit khmat iong, bad ia kane la iohi katba ki dang iaid pahara ha ki thain jong ka lad umsohsun, them Bijoy.
Shuh shuh kaba kham phylla ka long ba mynno mynno ym ju kham iohi koit ba ki pulit pyniaid kali kin kieng tiar siat hynrei mynta ka sngi ha ka sien ba nyngkong la iohi ba uwei u pulit pyniaid kali ha IGP, ka jaka kaba don ha jan ophis jong u SP bad hajan Addl. Secretariat u la pyniaid kali ryngkat ka tiar siat ba u la kieng ha syngkai.