Iaid shaid shaid ka jingpyntrei ia ka jaka shong peit kai, ka Laitkseh Sport Club

Nongstoin:Ka jingpyntrei iaka jaka peit kai ne ka gallery jong ka Laitkseh Sport Club ka la iaid shaid shaid bha ha kaba ia katei ka jingpyntrei la wan ruh ban jurip da u MLA jong ka Nongstoin myn haka taiew ba la lah.

Ia katei ka jing pyntrei na kabynta katei ka jaka peit kai ne ka gallery hapoh Laitkseh la wanrah da u MLA jong ka Nongstoin lyngba ka State Sport Council ha ka mang tyngka kaba Rs.40,81,920/-(Sawphew lak phraphew wei hajar khyndia spah ar phew tyngka).

Kum ban shu pynkynmaw ba ia katei ka jingpyntrei ia katei ka jaka shong peitkai ne ka gallery la pyntrei da u Bah Wadlad kyrpang Iawphniaw u ba dei u wei na ki riewrangbah jong ka sor Nongstoin, hynrei u la aiti noh pat sha ka Laitkseh Sport Club ba kan pyntrei nadong shadong ha kaba wat iaka 10% jong katei ka jingtrei ruh um shym la treh ban shim hynrei u la aiti ha katei ka sport Club khlem da shim pisa.

Ha katei ka jinghiar jurip jong u MLA ia katei ka jingpyntrei u la lap ba ka long shisha kaba i hun wat lada ka dang dei tang kaba rit hynrei ka Laitkseh Sport Club ka la pyntrei bha bad lada ka bneng ka ailad bha i mat katei ka project kan sa dep ha shuwa u bnai December jong mynta u snem.
U Bah Macmillan Byrsat, MLA haba kren, ha u nongthoh khubor u la pynpaw iaka jingsngew kmen ban iohi ba katei ka jingtrei ka la iaid shaid shaid bad u la ong ruh ba hadien ba la dep ia katei ka jingpyntrei kan long ka jingmyntoi kaba khraw iaki nong wan peit kai kiba ju wan ban wan ia kyrshan iaka lympung ialehkai kaba ju pynlong da ka Laitkseh Sport Club.

U Bah Byrsat u la iathuh ruh ba ka jingieid phutbol bad ka jinglah jong ka Laitkseh Sport Club ban pyniaid bha iaki lympung ialehkai kala pynlong ia u MLA ba un pyrkhat kyrpang na kabynta kane ka Club namar ha ki snem ba la dep wat lada kane ka Club ka la shna iaki jaka shong da ki siej pynban ka long pat kawei na ki Club kaba la paw ha ki rukom pyniaid phutbol ha kaba da ki hajar ki paitbah ki ju wan ban sakhi ia ki jingialehkai ha katei ka shnong.
Shuh shuh u MLA u la iathuh ruh ba nakabynta katei ka Club un sa iarap biang ha ki snem ki ban sa wan khnang ba baroh ki jaka shong kin da ker sawdong iaka madan bad ban pynsuk iaki paitbah nongpeitkai.