Iaid paidbah palat 200 ngut ki muster roll ha Jowai

Jowai, 13 Jymmang:
Mynta ka sngi haduh kumba 200 ngut ei ei ki nongtrei Muster Roll hapoh ka lama jong ka Muster Roll Workers’ Union, Jaintia Hills District, ki la mih paidbah ban ia iaid paidbah naduh District Library, Mynthong Jowai shaduh Daimasi Ladthadlaboh Jowai halor ka nongrim ba ki la shah lehbein palat pud ha ka sorkar.
Kitei ki Muster Roll ki dei kiba trei ha ki tnad sorkar bapher bapher ha rilum Jaintia.
Ha ka jingiaid paid bah ki nongtrei Muster Roll ki la rah da ki placard kiba don ki jingthoh ban pynpaw pyrthei ia ki jingeh baper bapher jong ki. Ki nongialam ki Muster Roll kiba kynthup ia u Dameki Paswet kum u President bad ka kong Radadeisar Passah ha ryngkat u L Pariat kum u nongaibuit nalor kiwei kiwei ki la leit ban ia kynduh ia u DC ban aiti ha u ia ka dorkhas ban pynpaw ia ki jingeh jong ki.
Ki mat kiba ki nongtrei Muster Roll ki dawa ka long ban ithuh noh ia kito ki muster roll kiba trei palat ia ka 10 snem katkum ka Megha laya Regular Casual Worker’s Scheme 1996.
La dawa ruh ba haba don ba lait thylli ki post, ki tnad sorkar ki dei ban pyrkhat shwa ia ki Muster Roll katkum katei ka Scheme
La dawa ruh halor ka  Meghalaya building and other construction welfare fund. La laslem ki por naka liang ka sorkar kala ot na ka jingioh ki contractor 1% ban ai bhah iaki muster roll bad ha ka Jylla.
“Kane ka 1% kala kot da ki klur hynrei tang shi percent ruh ki muster roll kim shym la ioh bad kane ka pynishai ba ki shah niewbein bad shah iuhroit halor ka hok”, la ong Paswet
Shuh shuh la pynsngew ruh ia ki jingeh halor ka jingsahkut ka bai nongsngi kaba ym shym la pynkiew satia. Ka bai nong sngi jong ki Muster Roll ka long tang 170 tyngka bad kadei ka jingsiew kaba rit tam na ki jingsiew ha baroh ki jait kam kaba ki la pynpaw ba kim lah ban im tang da kane ka bai nongsngi ha kane ka juk rem.
Ha kaba iadei bad ka rukom ia ka bai nong, ki Muster Roll ki la dawa ba ka bor sorkar bad ki tnad sorkar kidei ban bud ia ki kyndon jong ka ain da ka thep ia ka jingsiew sha ki Bank Account ym ban shu ai ha kti kat sha balap.
Ki Muster Roll ki la pynpaw ruh ia ka jingeh ba nalor ba duna ka bai nongsngi, sa ka slem ban ioh bai nong. Ka shimpor haduh 3 lane 4 bnai ban kin ioh bai nong.