Iaid paidbah ki nongtrei, ban pyrshah ia ka sorkar pdeng

Shillong, 02 Nailur:
Da ki hajar ki nong-trei ha ki tnad bapher bapher kiba don ha ka nongbah ki la iamih paidbah ban iaid ha surok mynta ka sngi ban pynpaw pyrshah ia ki polisi ka sorkar pdeng. Kine kiba iaid paidbah ki kynthup ki nongtrei na ki seng nongtrei bylla, ki nongtrei ha bank, telecom, kar-khana bad aganwadi, bad kiwei ki tnad.
Ryngkat ki lama ki jingthoh bapher bapher, la pynlong ia ka jingiaid paidbah kaba sdang na Additional Secretariat ba la pyniaid da ka All India Trade Union Congress (AITUC). Ka General Secretary ka AITUC ka Vijay Laxmi ka la kynthaha ia ka sorkar pdeng NDA namar ki polisi pyrshah ia ki paidbah bad dawa ban pynkylla ia ka ain jong ki nongtrei bylla.
“Ka sorkar pdeng ka la niew bein ia ka jingbit jingbiang jong ki nongtrei bad ka siang karpet ia ki kompeni bah eh”, ka la ong bad bynrap, “ka polisi jongka ka long kaba pyrshah ia ki paidbah, ka kyrshan tang ia kiba riew spah, ia ki kompeni”.
Ka la ong ba ka sorkar ka la siang karpet ia ki heh spah, ia ki kompeni ban wan theh pisa ha ki tnad bapher bapher kum ha ka tnad Iada ri, tnad pla pisa ban noin bein ia kiba duk.
Ka la ong ba ka FDI bad ki Multi National kompani kin ai kam tang ia kito ki briew kiba la tbit kiba bun ha ka Software Sector.
“Kane ka sorkar ka la kular ban ai kam 2 klur ngut ha ka shi snem hynrei ka pynmih kam tang 16 lak tylli bad kata ruh lyngba ki kam kontrak bad ba shu die sha ki kompeni ka bym dei jingshngain eiei ia ki nongtrei,” ka la ong. “Ka jingsiew kaba biang dei ban pynthikna sha ki nongtrei bylla kaba rit eh duh T.18,000 ha ki kam bym dei sorkar bad ka bai bam tymmen kaban long T. 3,000 shi bnai.
Ka la iathuh ba ki la dep aiti ia ki 12 tylli ki mat mynshem snem sha ka sorkar pdeng hynrei haduh mynta kam don eiei ka jingmih haduh mynta. Nalor ka jingshah ban bein, ki nongtrei bylla ki la sha ban bein ruh na ka jingkiew dor jong ki mar ki mata bad ka dei ka kamram jong ka sorkar ban shim ia ki lad ki lynti ban pynbeit ia kane lyngba ka Public distribution System kaba dei ka bynta jong ka Food Security Act.