Iaid kjat ki khynnah ka Marian Hill ha Jowai

Jowai, 23 Nailur:
Mynta ka sngi da ki spah ngut ki khynnah skul jon ka Marian Hill Higher Secondary School ki la iaid paidbah na phyllaw katei ka skul shaduh District Library na ka bynta ban pyndonkam ia ki lynti iaid kjat, kum shi bynta ban pynsngewthuh ia kito ki nongdie madan kiba pynlong ia ki lynti iaid kjat, kum ki jaka die jingdie jong ki.
“Ngi dei ki khynnah skul bad ngi donkam bha ia ki Footpath na ka bynta ban lait na kino kino ki jingmynsaw lada iaid na surok, hynrei kine ki footpath la kam trai da ki nongdie madan ha baroh shilynter ka Iawmusiang”, la ong kawei na ki khynnah skul.
Kane ka jingiaid paidbah kitei ki khynnah skul ka long hadien ba ki pulit ka Jowai Traffic Police hapoh ka jingialam u Officer In Charge Inspector DH Pde bad Second In charge, bah Jason Wahlang kiba la leit man ki skul ban ai jinghikai bad ban pynsngewthuh ia ki halor ka hok jong ki ban iaid lyngba ki footpath nangta shaphang ki kyndon traffic bad ruh halor ka jinglehkhuid.
Ka tnad Pulit Traffic ha ryngkat ka jingiatreilang bad ka Jowai Municipal Board ki la pynlong ia ka jingkhynra ia ki nongdie madan kiba la kamtrai ia ki footpath. Ym tang katta ki la leit pynshai ruh sha ki skul bapher bapher ba ki khynnah skul kidei ban pyndonkam ia ki footpath namar ki don ka hok, ym na ka bynta ka hok jong kito ki nongdie jingdie.
“Ki footpath kidei na ka bynta ban iaid lynti ki paidbah khamtam ki khynnah skul ym na ka bynta ban die jingdie”, la ong ki khynnah skul haba kren bad ki katto katne ngut ki nongdie madan.