Shillong: Ka jingiakhih khlem pud ki nongtrei ka GVK EMRI 108 hapoh ka lama ka Meghalaya EMRI Workers Union (MEMRIWU) ka la iaid mynta sha ka sngi ba hynniew hynrei na ka liang ka sorkar kam pat khot iakren eiei ne phah ktien eiei ia ki. Kine ki nongtrei ka 108 kila iashong ha ka ïing dara ha Lawmali, Shillong.
Haba kren sha u nongthoh khubor myn hynnin ka sngi, u president ka seng u bah Roipar Kharraswai u la ong ba ka jingiakhih kan bteng beit namar ba haduh mynta ka sngi kam shym la ktien ne phah eiei.
“Ka jingiakhih kan dang bteng beit khlem pud, bad ngi don ha ka ïing dara ha phyllaw ka ophis ha Lawmali”, la ong u bah Roipar.
U la ong, “Haduh mynta ka sorkar ka khlem khot iakren eiei ne khlem phah ktien eiei wat tang shi kyntien ruh”.
Ki nongtrei ka 108, kila sdang ia ka jingiakhih naduh ka 1 tarik Risaw namar ka jingkuman jong ka sorkar jylla ban pynbeit ia ki jingeh kiba la mih hapoh jong ka EMRI kaba la pyniaid da ka GVK ha ka jylla.
U bah Roikupar u la iathuh kham mynshwa ruh ba kane ka jinngiakhih ka long kaba khlem buh por bad ban pynbor ia ka sorkar ba kan peit ia ka jingeh ka jong ki kaba kila dawa da kaba jia jia mynta la palat shisnem tam mynta ka sngi kila leit ban buh lut ia ki 108 Ambulance sha ophis trei kam jong ka EMRI kaba don ha Lawmali.
La ong ba kaei kaba la pynbitar ia baroh ki nongtrei jong ka EMRI ka long ba ka GVK kaba peit ia jingpyniaid ia ki 108 Ambulance ha ka jylla kam shym la burom wat ia ka High Level Committee kam burom, haba ka jingiakren ka dang iaid kala khate pynban ia ka tulop jong ki nongtrei kane kala pynbitar ia baroh 204 ngut ki nongtrei kiba don hapoh jong ka EMRI.
Baroh ki 108 Ambulance ki 43 tylli ki jaka kiba la buh ha kylleng ka jylla Meghalaya Mynta ka sngi kila wan kiew lut sha Shillong ban leit buh ia ki ha ka ophis trei kam jong ka EMRI ha Lawmali katba ia ki shabi jong ki kali pat la bat da ki nongniah jong ki 108 ambulance.
Phi don ban ong eiei?