Iaid beit ka pakhang shnong ba 12 kynta ki sengbhalang

Shillong,10 Nohprah:
Ka pakhang shnong ba 12 kynta ki sengbhalang kaba ki la khot mynta ka sngi ka la iaid beit iaid ryntih khlem kino kino ki jingjia ba sngewsih. Kat kum ka khubor ba la ioh lum na ki pulit, la iathuh ba haduh mynta ym shym la ioh kino kino ki jingujor na kino kino ki bynta ka jylla. Ha kitei ki kynta pakhang shnong baroh ki ophis sorkar, ki bank, bad kiwei pat ki ophis shimet ruh ki la khang khyrdep lut. “Ym shym la don kano kano ka jingjia ba sngewsih ha kino kino ki bynta ka district, ka pakhang shnong ka la iaid beit” ong u SP ka East Khasi hills u Bah M Kharkrang. La iohi ruh ba ha ki kynta ka pakhang shnong ka surok ka la thylli bad ym don kali kiba iaid ba ieng lait noh tang ki kali pulit bad katto katne ki kali sorkar.
Shuh shuh ha kitei ki kynta ka pakhang shnong ka jingwan poi trei ki nongtrei ka la poi tang 10 na ka shispah, katba ka Secretariat ka la thylli bym shym la don ki nongtrei kiba la wan trei lait noh tang katto katne ngut ki ophisar heh. Ha West Jaintia hills u Deputy Commissioner u Bah Peter Dkhar u la ong ba ka jingwan trei ki nongtrei ka poi sha ka 52 na ka shispah, u DC u la ong ba ha katei ka District ruh ym shym la don kino kino ki jingjia bad baroh ki dukan rit ki dukan heh ki la khanglut. Ka jingwan poi trei ki nongtrei ha East Jaintia hills ka poi sha ka 40%, ha Ri-Bhoi 5%,South West Khasi Hills bad ha West Khasi hills 15%.
Ha kawei pat ka khubor, la pyntip da ki Sengbhalang, ba ka pakhang shnong, kaba la pynbeit ba kan long 36 kynta, la pynbeit noh tang 12 kynta, ha baroh ka Khasi bad Jaintia Hills. Katei ka dei ka jingpynbeit na ki Sengbhalang, na Jaintia Hills, kaba la ioh da ka email kaba la phah hynnin ka miet, wat la kham mynshwa, ha ka email kaba la phah nyngkong, la iathuh ba ka pakhang shnong kan iaid beit kumba la pynbna kham mynshwa ha Khasi Hills, wat la ha Jaintia hills pat la pynjynsur sha ka 12 kynta.