Nongpoh: Ka long shisha kaba sngewkhia ban iohi ia ki kynrum kynram ha ki shnong ki thaw bad kaba la pynmih ia shibun ki huri hura kiba ktah ia ka shongsuk shongsain ki paidbah, namar ka jingdon jong ki katto katne ki briew kiba ju mlien ban iaknieh ia ka kam rangbah shnong, da kaba wanrah ruh ia ka jingiapait iapra ha ki shnong ki thaw.
Lah ruh ban kdew hangne, ba dangshen u EM ka KHADC ba dei peit ia ka tnat Elaka, u la hiar sha ka shnong Madan Umwang, na ka bynta ban leit pynbeit ia ki huri hura kiba la mih ha katei ka shnong tang namar ka kam iaknieh rangbah shnong, hynrei mynta pat kaba kum katei hi ka kam iaknieh rangbah shnong, ka la paw pyrthei sa ha shnong Mawshut, kaba hap hapoh ka Raid Iapngar jong ka thain Mawlasnai.
Na ka bynta ban pynbeit ia ki kam iaknieh rangbah shnong ha Mawshut, hynne ka sngi u Martin Lyngdoh, u Jwit Lyngdoh kiba dei ki nongkitkam ba hakhlieh ka Raid Iapngar, ha ryngkat ka jingsynran lem bad kiwei ki riew rangbah, ki la hiar sha katei ka shnong da kaba ai ruh ia ka (Sanad) kaba la pynkupbor da ka KHADC sha u Bah Hilarious Suting, ban long kum u Acting Rangbah shnong ba shipor ka shnong Mawshut, kata hadien ba la pynduhnoh ia ka Sanad kaba la ai sha u Bah Shanbor Nongrum bad Gilbert Nongrum.
Ha kane ka sngi, shwa ba ki nongkitkam ka Raid Iapngar kin aiti ia katei ka Sanad sha u Bah Hilarious Suting, ka la don ka jingiatai kaba jur bha hapdeng ki paidbah bad ka daw hi kaba la pynlong ia ki paidbah ba kin iatai, ka dei hadien ba ki tieng ioh nangmih shuh shuh ki huri hura hapoh jong katei ka shnong.
Hynrei na ka bynta ban iaid beit iaid ryntih ki kam hapoh ka shnong ka thaw, na ka liang ki nongkitkam ka Raid, kumba la pynkupbor da ka KHADC ki la aiti ia katei ka Sanad sha u Bah Hilarious ba long kum u Acting Rangbah shnong ka Mawshut.
Katkum ka jingiathuh da ki paidbah ha katei ka shnong, la ong ba tang na ka daw jong ka jingdon ki riew rangbah kiba la iaknieh ia ka kam rangbah shnong, ka la pynmih ia shibun ki huri hura tad haduh ba kan da ktah ia ka shongsuk shongsain bad wanrah ruh ia ka jingiapait iapara hapoh jong katei ka shnong.