Shillong: Ha ka 8 tarik mynta u bnai ha ka por 11 baje mynstep, ki Majistor ryngkat ki pulit ki la leit ban khynra ha ki par dewiong kiba don ha ki thaiñ Dkhiah ka East Jaintia Hills bad ki la ioh kem 3 ngut ki briew katba ki dang tih dewiong, kitei ki 3 ngut ki dei kiba la tip kyrteng kum u Abdul Hussain Barbhuya, Sahabaj Alam Barbhuya bad u Nassimuddin.
Ha katei ka juh ka sngi, ki pulit ki la leit khynra ruh ha ki thaiñ Umshong ( EJH) bad ki la ioh kem 5 ngut ki briew kiba la tip kyrteng kum u Sabir Hussain (24), u Saidur Rahaman (28), u Md. Sahid Uddin (30), u Abdul Salam (33) bad u Hasmat Ali, la kem ia kitei ha ka por ba ki dang tan um na krem dewiong. Na kitei ki pulit ki la ioh kurup ia ki Pump tan um bad 170 tylli ki jingpynbthei ryngkat 160 tylli ki detonators.
Ki pulit ki la leit khynra ruh ha ki paw dewiong kiba don ha ka thaiñ Jalaphet Lad Kyrluh bad ki la lap ba ki don ki par dewiong kiba dang shu sdang tih thymmai. Ki pulit ki la kem ia u sordar ba pyniaid krem dewiong u Nazarul Islam. Kitei ki par kiba tih dewiong ki dei kiba dei trai da u Tillerson Syad bad u Enjoywell Syad, la kem ruh ia u Manager u ba la tip kyrteng kum u Aiban Bareh. Na kawei pat ka jaka la kem 4 ngut ki briew na par dewiong kiba la tip kyrteng kum u Pradip Lama, Binod Gurung, Gopal Sherestha bad u Ruben Rai.