Iahap u Director DSEL ban shimti ka sorkar ia ki nonghikai: JACATAM

Shillong, 19 Jymmang:
Ka jingialang jong ki nonghikai JACATAM bad u Director ka DSEL mynta ka sngi, ka long kaba sngew tynnad halor ka jingdawa ban shimti ka sorkar tang ia ki kam nong hikai skul ha ka jylla kumba long sha kiwei ki jylla ka ri India.
Katkum ka jingia thuh u Publicity secretary ka JACATAM u Babu Ku lar Khongjirem, u Director ka DESL, u Ambrose Ch Marak u la iathuh ha ka jingialang bad ki nong hikai hynne ka sngi ba ki don lai jait ki kam hikai skul ne rukom pyniaid ha ki jylla kynthup Tamil Nadu bad Goa.
Kawei ka dei skul ba pyniaid ka sorkar, ki skul ba siew tulop ka sorkar bad ki skul shimet.
Katkum ka jingia thuh u Director, u Babu Khongjirem u la iathuh ba ha kitei ki jylla, ka sorkar ka shimti tang ia ki kam hikai bad ka sorkar kam ju mushli satia ia kine ki skul ha ka rukom pyniaid skul ne ha ka kam thung nonghikai bad kam don satia ka jingpynkynriah ia ki nonghikai. Hynrei ka sorkar ka siew beit tang ia ka tulop, nalor kiwei ki jingmyntoi kumba ioh lem ki nongtrei sorkar, la iathuh u Babu Khongjirem.
U Director u la iathuh ba ki skul ha kitei ki jylla ba kiba don naduh u snem 1981 haduh 1991, ka sorkar ka la shimti ia ka kam hikai lait noh ki bym kwah. U la ong ba ki don ruh la kijong kijong ki director na ka bynta ki kyrdan pule bapher bapher kum ka Primary, Secondary, Higher, Technical Education, SSA bad kiwei de, katba ha kane ka jylla Meghalaya la don tang ujuh u director ia kine baroh.
Ha jylla Tamil Nadu bad Goa, ka sorkar jylla ka la bei 25 percent bad ka sorkar pdeng ka bei 75 percent ha ka jinglut ha ka pule puthi, katba ha kane ka jylla Meghalaya, ka sorkar jylla ka bei tang 10 percent bad 90 percent na ka sorkar pdeng.
Na ka liang u director u la ong ba un leit

biang ban pule ban wad jingtip shuh shuh sha ki jylla ba marjan kum ka Mizoram, bad Assam halor kane ka provincialisation bad un sa leit biang ha kane ka taiew ban wan bad un sa kynduh biang bad ki nonghikai u Jylliew ban wan.
“U Director u la phah ia kane ka kaiphod sha ka sorkar na ka bynta ba kan shim ia ki lad ki lynti ba donkam ban pynkylla ia ka rukom pyniaid skul ha kane ka jylla”, la iathuh Babu Khongjirem.
Halor ka DCRG, u director u la kyrpad ia ka tnad pla tyngka ba kan pynlait noh ia kane ka pisa kaba T. 2.78 klur sha ki nonghikai ba la shong thait.