Iadait dor ka bor pyniaid ban siew tulop ia ki nongtrei ka MCCL

Shillong, 19 Naiwieng:
Ki nongtrei ka Mawmluh Cherra Cement Limited (MCCL) ki la weng noh iaka jingthmu ban iakhih sangeh trei hadien ba ki bor ba dei peit ki la kohnguh ban pynlait shwa katto katne ka tulop hadien ki la iadait dor namar ba ki nongtrei ki dawa ban ai shwa T.20 hajar sha man ki nongtrei katba ki bor pyniaid ki la ong ban siew shwa tang T. 15 hajar. Ki nongtrei ka MCCL ki khlem pat ioh tulop haduh shiphew bnai mynta. Haba iakren bad u President ka MCCL Employees Union (MCCLEU) u Bah S Wahlang u la iathuh ba mynta ka sngi ka jingialang kaba la long ha Sohra ka la shim ia ka rai ban sangeh noh shwa ia ka jingthmu ban iakhih hadien ba ka  bor pyniaid ka la kohgnugh ban pynlait ia ka katto katne ka tulop jong ki nongtrei.
“Ngi la weng  noh ia ka jingthmu iakhih namar ba ki bor pyniaid ki la kubur ban pynlait ia ka tulop.Ngi la dawa ba ka dei ban pynlait mar T. 20 hajar uwei u nongtrei hynrei na ka liang jong ki bor pyniaid ki la ong ba kin siew T. 15 hajar”, la ong u bah Wahlang.Kane ka jingiadait dor jong ka bor pyniaid ka MCCL ka long hadien ba kim don pisa satia ban siew kumba la dawa ki nongtrei. La sngewthuh ba ki nongtrei kin pdiang ia kane ka jingtyrwa ka bor pyniaid ban siew shwa tang mar T. 15 hajar ba min ioh ban thied ia ki jingdonkam kyrkieh hadien 10 bnai bym ioh ia ka tulop.Ki don haduh 500 ngut ki nongtrei ka MCCL baroh ki bym ioh tulop haduh 10 bnai namar ba ka bor pyniaid ka la ai daw bym lah ban pynmih pisa namar ba ka karkhana ka la sangeh treikam la jan shi snem bad ka dang ap ban treikam ka karkhana thymmai.