Iada U Mukul ia ki bamsap, kem ia ki shu suba:CSWO

Shillong, 07 Risaw:
Ka Civil Society Women’s Organization (CSWO) ka la pynpaw ia ia jingsngewkhia halor ka jingkem pathar jong ki pulit ia ki samla tang naba shu suba, hynrei ia ki briew kiba don ha ka sorkar kiba donkti ha ki kam bamsap la iada da u Myntri Rangbah, ong ka CSWO.
Ha ka kyrwoh ba la phah da ka kong Agnes Kharshiing President ka CSWO, ka la ong ba, ka seng ka kyndit halor ka jingbishar jong u Myntri Rangbah ia ki sengbhalang, hynrei u iada pat ia ki nongbamsap ia ka skhim paidbah wat haba la ujor da ki sengbhalang.
U Mukul Sangma, u dang iada ia ki nonglehtuh pyndam sia lih halor ka kam thung nonghikai skul, ka bamsap ICDA, ia ki nongklun jaka ha New Shillong kiba thied ialade ha ka dor T.1 tyngka shiphut sawdong, uba don bynta ha ka ‘face encounter’ u MK Singh, Choko uba siat iap ia ki samla khlem ailad ba kin pyndem, kiba donkti bamsap tin sop iing, ia ki karkhana kew kiba ai kew ha ka kyrteng kiba la iap, ia ki nongdie khaw kiba iadonkti bad ki ophisar ka tnad Supply bad kiwei kiwei ki kam bamsap.
Kine ki kam bamsap ki la paw penryngkew, hynrei ki briew jongu ki la leh matlah bad kim shym la leh ei ei pyrshah ia ki, hynrei la pynbor pynban ia ki ba kin leh tyngeh ia ki sengbhalang tang na ka daw ba ka don ka jingsuba.
Ka tnad pulit bad ki pulit ki dei ban sngewthuh ba kim dei satia ki shakri jong ki riewsain pyrthei lane jong ki ophisar bamsap, hynrei ki la shim smai ban iada ia ka jylla bad ia ki paidbah. Kum ka seng ka pyrshah jur halor ka jingkem ia ki samla tang namar ba shu suba, hynrei kim nud pat ban ktah ia ki ‘riewbamsap.
Ka kong Agnes Kharshiing ka la pynshai ruh ba ka seng kam shym la pynlong ia ka jingiaid paidbah ha ka 25 tarik u bnai ba la dep, hynrei ki katto kane ki longkmie ki la leit lyngba ka Motphran ha ka por ba ki thmu ban leit phai noh sha iing.