Ia ther kuli ki pulit bad ki GNLA

Shillong, 25 Risaw:
Haka step lah sngi u Blei ha ka por 7 baje eiei kala don ka jingiather kuli hapdeng ki pulit SWAT bad ki dkhot ka GNLA. Katei ka jingjia ka la jia ha ka khlaw kaba don hajan ka shnong Andamari kaba don ha ki thaiñ Chokpot.Ki pulit ki la ioh jingtip na ki bor syntiat ba ka GNLA ka thmu ban wan thaw ktem ha thaiñ Chokpot ha ka shnong kaba don hapdeng ka Sibbari bad ka Rongrikkimgre ha South Garo Hills bad ki la ioh jingtip ba ki dkhot ka GNLA ki la don ha katei ka jaka la kumba ar sngi eiei.
Tang mar ia ioh jingtip ki pulit SWAT ki la hiar sha katei ka jaka, bad katei ka dei artad ka por ba ki dkhot ka GNLA ki dang khreh ban dih sha step hynrei kyndit u nongpahara jong ki u iohi ia ki pulit Commando, bad kumta hi u la ther kuli sha ka liang ki pulit. Hangtei ka la mih ka jingiather kuli mar kylliang kaba la neh la katto katne minit hynrei ki dkhot ka GNLA ki la phet krad ha ki khlaw ba rben.
Kam shym la don kano kano ka jingmynsaw na baroh arliang, ka khubor na ki pulit ka la iathuh ba ia katei ka kynhun ka GNLA la ialam da u Kamdat –Commander.