Ia ther kuli ki pulit bad ka GNLA, pynpra ia ka ktem

Shillong, 15 Lber:
Ki pulit jylla ha ka sngi saitjain jong ka taiew, ki la leit ban khynra lehnoh ha ki thain ka Garo Hills, hynrei ha katei ka jingleit khynra lehnoh ka la mih pynban ia ka jing iather kuli markylliang kaba jur hapdeng ki leh noh ka GNLA bad ki pulit. Katei ka jingjia ka la jia ha ka por 6 baje mynstep ha ka shnong Rewak kaba don ha South Garo Hills.
Ka shnong Rewak ka jngai kumba 53 kilo mitar na sor Baghmara, ki pulit ki la kam ba ha katei ka jingiather kuli ki la don ki lehnoh kiba ngat kuli bad ki la mynsaw jur hynrei ki la ioh lad pat ban phet krad. Katei ka jingleit khynra ki pulit ha ka shnong Rewak ka dei hadien ba saw ngut ki pulit ki la iap hashen ha ka jingther kuli ka GNLA ha ka por ba ki dang iaid lynti ha ka sngi hat majai, ong ki khubor pulit.
“Ka kynhun jong ngi ki la buddien ia ki lehnoh kiba la ther kuli ia ki pulit, ha ka sngi hat majai bad la ioh jingtip kaba thikna ba ki don ha ka shnong Rewak, mar mar ka kynhun jong ngi kaba la pynkhreh bha ka la leit sha katei ka jaka hynrei ki la ioh phet noh” ong u bah Lakador Syiem,  SP ka South Garo Hills. U bah Syiem u la ong ba ki pulit kim ioh lad bha ban ia khun ha katei ka jaka namarba ki don bun ki riew paidbah, “Ngi sngew thikna bha ba u Sohan D Shira ruh u donlang ha katei ka ktem, kaba ngi la h pynpra, hynrei ngim lap eiei” ong biang u bah Syiem. Ha kaba iadei bad ka jingther kuli ka GNLA ia saw ngut ki pulit kiba la iap bad ar kiba mynsaw, ki pulit ki la kem ia uwei u dkhot ka United Liberation Front of Asom (Independent) uba la suba ba u dei uwei na kiba donkti lang, la kem ia u na Mahadeo, “Udei u ba na ka kynhun jong ka Dristi Rajkhowa” pynkut u bah Syiem.