Ki Longkmie na ka Raid Nongbri, Ri-Bhoi District mynta ka sngi ki la leit tur puk sha thanat pulit jong ka Nongpoh PS, hadien ba ki la ioh jingtip ba ka President bad ka Secretary jong ka Seng Longkmie Raid Nongbri ki la shah ujor ejehar halor ka jingshah kynnoh ba ki la leit ban khang tala ia ka ïing u Bah Transhon Mawphniang, da kaba kynnoh ruh ba u Bah Transhon u dei u nongdie kyiad ryngkat bad ka lok jong u ka Kong Triansiai Myrthong.
Ka jingleit khang tala bad bret ia ki tiar ki tar jong ka ïing jong ki shabar ka ïing kaba don ha ka shnong Umle, katkum ka jingkynnoh, ka la pynlong ia u Bah Tran shon bad ka Triansiai ban ujor syndon da ka ejehar pyrshah ia ka Kong Philadoris Nongrum, President bad ka Kong Yoris Markhap, General Secretary ka Seng Longkmie.
Dei halor kane ka nongrim ba ka Seng Longkmie, hynne hi ka sngi, ka la leit tur beit puk hakhmat katei ka thanat bad dawa ba kitei ki briew ba ujor ejehar ki dei ban weng noh mardor ia katei ka ejehar.
Kumta, na ka liang kitei ki shi kurim ruh kim banse ban weng noh ia katei ka ejehar hadien ba la kren iasngewthuh jingmut hapdeng u Ban Transhon lem bad u Rangbah Shnong, katba ki paidbah ki dang ia ap shabar ka thanat ha Nongpoh.
Hadien ba la iohsngew paidbah ia ka jingpynbna ba la weng noh ia ka ejehar, ba baroh ki paidbah ki la mih noh na Nongpoh PS hynne ka sngi, hakhmat ka jingdon lang ki heh pulit kane ka thanat.
Phi don ban ong eiei?