Ia peit matdong mar kylliang para MLA Congress Kam ki MLA, U Mukul ban nym lah pynhap shuki

Shillong, 10 Nailur:
Ki MLA kiba don ha ka liang jong u Dr. Mukul Sangma ki la pynpaw ia ka jingsngew skhem ba ym nym lah ban pynhap noh ia u Dr. Mukul Sangma na ka shuki Myntri Rangbah.
Wat la ha kine ki khyndiat bnai ba la dep ka la don ka jingdawa pyn paw pyrthei ban pynhiar shuki noh ia u Dr. Mukul Sangma, hynrei ki MLA kiba don ha ka liang jong u Dr. Mukul ki ong ba ym nym lah ban pynhap ia u.
“Katno ngut kin don kito kiba pyrshah ia u Dr. Mukul, ki don tang kumba 8 ngut ei ei” la ong uwei na ki MLA ba iajan bad u Dr. Mukul Sangma haba kren bad u nongthoh khubor.
Na kane ka jingkren jong utei u MLA la sngew thuh ba wat la u Dr. Mukul Sangma un dang bteng kum u Myntri Rangbah bad lada um pynhiar shuki ia ki katto katne ki Myntri sorkar, hynrei ka la don ka jingiapeit matdong hapdeng jongka namar ki da jer ruh da ka kyrteng ia kiei kiba don ha ka liang jong U Mukul bad bad ia kiba pyrshah ia u.
Katkum utei u MLA u bym kwah ban pynpaw kyrteng u la jer kyrteng ia ki 3 ngut mi myntri sorkar kiba la kham rangbah kiba u niew ba ki long pyrshah ia u Dr. Mukul Sangma, hynrei um shym la kren shai satia la u Dr. Mukul Sangma un pynhiar shuki ne em ia ki lada ym lah ban pynkylla ia u kum u nongialam bad kumjuh ruh kum u Myntri Rangbah.
Lah ban kdew hangne ba dang shen u Luizinho Faleiro uba dei u General Secretary jong ka All India Congress Committee uba dei peit ia ka Meghalaya um shym la kren shai satia halor ka jingdawa jong ki MLA ban pynkylla nongialam noh ia u Dr. Mukul Sangma bad la sngewthuh ba ka Congress hi kam pat lah ban pynbeit halor kane ka mat jingdawa.