Ia kynduh myntri sorkar pdeng U Purno, na ka Rongai Projek

Shillong, 13 Nailar:
U Lamphang barim ka Lok Sabha u Purno A Sangma uba dei ruh u MP ka Tura mynta ka sngi palei u la ia kynduh ia ka myntri sorkar pdeng kaba peit ia ka tnad Water Resources ka Uma Bharati, ha iing dorbar bah ka Ri ha Parliament bad u la ia kren ba ka sorkar kan pynim biang ia ka Rongai Valley Projek kaba la shah pynduh pyndam noh ha ka sorkar Meghalaya.
Kham ha shuwa ia kane u Purno ryngkat bad u khun jong u, u Conrad Sangma uba dei ruh u myntri sorkar barim ka jylla ki la ia kynduh ia ki heh ophisar jong ka tnad Water Resources ba kyn thup au Additional Secretary u Dr. Amarjit Singh ban ia kren na ka bynta katei ka projek.
Hynrei shuwa ia kane ruh u Purno ryngkat u myntri barim ka sorkar jylla u Manirul Islam Sarkar ki la ia kynduh ia ka Bharati dang myn shem taiew bad ha katei ka jingiakynduh ki la aiti ruh da ka jingthoh sha ka ban pynim biang ia ka Rongai Projek.
Katei ka jingiakynduh jong u mynta ka sngi ha Parliament ia ka bharati ka long ban pynkynmaw biang ia ka halor ka jingthoh kaba u la dep aiti myn shem taiew, ha kaba ha katei ka jingiakynduh u la kham ioh por ruh ban batai kham bniah halor katei ka projek kaba ka sorkar Meghalaya ka la pynduh. Hadien katei ka jingiakren ka Bharati ka la hukum ia ki ophisar jong ka ba kin peit bniah biang ia katei ka projek bad ba ki dei ban pyniaid ia ka kam shakhmat.
Ka Bharati ka la kular shai ruh ha u Purno ba ia katei ka projek yn leh d aka sorkar India bad yn ym lah ban shu pynduh ia ka. Ki lad khubor ki la iathuh ruh ba hadien ba u Purno u la tynruh sha ka myntri sorkar pdeng ka tnad Water Resources ka la hukum ia ka sorkar Meghalaya ba kan pynkhreh biang ia ka jingtyrwa jong ka bad ia ka kam kaba sah yn pynbeit da ka sorkar pdeng. Katei ka jingpynkhreh kaba ka sorkar pdeng ka hukum ia ka sorkar jylla ban tyrwa ka kynthup ia ka jingpynthymmai ia ki jaka jngohkai pyrthei, ban pynbiang ia ka um bam umdih, ki pung dohkha bad kiwei pat.