Ia kynduh MR ka MEMA

Shillong, 4 Risaw:
Ka Meghalaya Electronic Media Association (MEMA) hapoh ka jing-ialam u bah Kyrmen Uriah President mynta ka sngi, ka la leit ban ia kynduh ia u myntri rangbah ka jylla u Dr.Mukul Sangma bad ha ka jingiakren bad u Dr.Mukul ki la kyntu ba u dei ban pyntreikam noh ia ka Risk Insurance Schemes bad ban pynheh ia ka skhim ai jingiarap ia baroh ki nongring dur khubor bad ki nongthoh-khubor. Ha kaba ia dei bad ka jingdawa pyntrei-kam ia ka RIS, ka MEMA ka la ong ba katei ka skhim ka long ban pynsuk ia ki nongthohkhubor khnang ba lada jia eiei ia ki ha ka por ba ki dang lum khubor ki bahaing hasem kin ym shah ktah ha ka jinglut jingsep.
U bah Uriah u la pynkynmaw ha u myntri rangbah shaphang ka jingshah thombor ki nongring dur khubor ha kiba bun ki khep kaba la jia ha u snem 2005, 2014, 2015 bad ka jingjia ba u nongring dur khubor u la iap ha ka jingjia aksiden ha Paikan, Assam ha u snem ba la dep ,u la kren ruh ha u myntri rangbah ia ka jingpynslem ki bor ka aiñ ban pynshitom ia ki briew kiba thombor ia ki nonglum khubor bad u la kyntu ruh ba ka sorkar ka dei ban siew bai lutksan.
Ha kajuh ka por u President ka MEMA u la ong ba katei ka kynhun ki nongring dur khubor ka ai ka jingkyrshan ba pura ia ka jingdawa ka Meghalaya Editor and Publisher Association (MEPA) ban pynheh ia ka Journalist Welfare Fund na ka bynta ki nongtrei ha ki ladpathai khubor bad ba ka sorkar kam dei ban siew tang shisien iarap pisa, ban pyntreikam ia ka Health Insurance Scheme ia ki nongthohkhubor ka jylla,ban pynsted ia ka Advertisement Policy bad kiwei.
U myntri rangbah u la ong ba ma u ruh u ngeit ba ka don ka jingshah thombor ki nonglum khubor bad ki donkam ka jingiada bad un pynbiang ruh ia ki skhim ai jingiada bad un thaw ruh ia ka komiti lyngba ka DIPR ban ia kren ia ka Journalists Welfare Scheme.