Ia kynduh ka Tamil Nadu, ia ka jing tyrkhong um kaba jur tasam mynta u snem

Ka Tamil Nadu, ka don ha ka jingrang tyrkhong kaba jubor tasam mynta u snem. Bun bah ki dohkha, ki la iap lut bad ki la per ha jrong um bad ka daw, ka long namar ba ka Selva Chinthamani ha Coimbatore, kam don um shuh.

Kawei pat ka pung, kaba ju dei ka tyllong um bah jong ka Tamil nadu, ka dei ka Porur Lake, ha kaba katei ruh ka la sdang tyrkhong um ha kine ki sngi. Kiwei pat ki pung, kiba kynthup ia ka Chembarambakkam, Poondi, Red Hills bad ka Cholavaram bad kitei ki dei kiba pynbiang um ia ka Chennai, hynrei kitei ruh ki la tyrkhong um.

Ki tyllong um, ki la rkhiang lut, namar ka jing duna um ha kine ki ar snem ba ladep, ha kaba wat ka ryngkew shapoh ruh, ka la tyrkhong jur ha kine ki sngi, ong ka khubor.

Katba kum ka jinglum jingtip jong ka Chennai Metropolitan Water Supply and Sewerage Board (Chennai Metro), ki tyllong um jong ka Cholavaram, kiba ju don um 1,081 mcft bad ka Redhills (3,300 mcft), kiba ju pyndap um ia ka Chennai, hynrei kitei ki la tyrkhong ha kine ki sngi, katba ka Poondi, ka don mynta 24 mcft, na kaei kaba ka dei ban don 3,231 mcft.