Shillong: Ka Khasi Student’s Union (KSU) mynta ka sngi ka la ia kynduh ia u myntri rangbah ka jylla u Conrad K Sangma ha ophis treikam jong u. Ha katei ka jingiakynduh ka KSU ka la pynpaw ka jingshaniah hapoh ka jingialam jong u ia ka jylla khamtam ha ka ban kyntiew ia ka roi ka par. Ka KSU ka la ai khublei kyrpang ruh namar ka jingthmu ka sorkar ban wanrah ia ka polisi kaba biang tam na ka bynta ban kyntiew ia ka pule dangle ha kane ka jylla.
Ha katei ka jingiakynduh ka KSU hapoh ka jingialam u President jong ka u samla Lambokstar Marngar ka la ai ia ka shithi dawa jong ka ha u myntri rangbah bad katei ka shithi ka don haduh 9 tylli ki mat jingdawa. Ka jingdawa kaba hakhmat duh ba ka KSU ka la buh ka dei halor ka jingthmu ka sorkar India ban tih Uranium ha kane ka jylla ha Mawthabah-Kylleng Pyndem sohiong-nongbah-Jynrin bad ka la dawa ba u myntri rangbah u dei ban pynsangeh noh shisyndon ia katei ka jingthmu.
