Ia kynduh 110 ngut ki nongsumar bad ai dawai Khasi

Shillong,7 Risaw:
110 ngut ki nongai dawai bad ki nongsumar Khasi kiba kynthup naduh ki Nongaidawai Kynbat, Ki Nongkhem, Ki Nongpynkha khun, bad kiwei pat ki la wan na ki 23 tylli ki shnong kiba hap hapoh ka hima Nongspung ki la pynlong ia ka jingiakynduh lang myn haka 5 tarik mynta ubnai ha ka shnong Madan Bitaw, Mawphlang C&Rd Block, bad kitei ki nongsumar Khasi ki dei ruh ki dkhot ka Society for Promotion of Indigenous Knowledge and Practices (SPIKAP). Ki shnong kiba la wan poi sha katei ka jingialang ki kynthup ia ka Shnong Madan Bitaw, Laitnongrem, Dempluh, Lawkhla, Pyn denlitha, Mawkneng, Wah lang, Mawkynjing, Laitnong rim, Laitkajaud, Laitdit huh, Mawsniang, Nongspung, Wahsholait, Lailyngkhoi, Madan Lyngkhoi, Mynjer (Nongspung), Mawsadeng, Lempluh, Laijithoh, Mawjongka, Kyndong Wahlang, bad Nongwah Lynnia, ki la pynpaw ia ka jingkmen ba ia kynduh lang baroh kiba ia don ha ka juh ka kam, bad ki la rai ban ia treilang ryngkat na ka bynta ka jingkiew, ka jingpynjanai, ia kane ka rukom sumar tynrai. Ia katei ka jingialang la pynbit pynbiang da u Bah Kyntiewborlang Syiemlieh, President, bad ki nongkit kam, Seng Samla Hima Nongspung ha ryngkat ka jingkyrshan lang u Bah M Rani, Acting Chief, bad u Bah D Syiemlieh, Secretary, kynthup ki Sordar Shnong, bad ki nongkitkam Hima Nongspung.
Ha katei ka jingialang, u Bah John F Kharshiing, Co-Chairman, MSPB, bad Chairman, SPIKAP, u la ai khublei ia ki Nongaidawai Kynbat/ Ki Nongkhem/ Ki Nongpynkhakhun, bad u la ong ba ka Sorkar ka la dei ban ai jingiarap kaba kyrpang ia ki nongsumar tynrai kum shibynta ban ai khublei ia ki ia ka jingshakri treimon sngewbha jong ki ha ki nong kyndong kiba jngai na ki Hospital Sorkar. U la ai khublei ia ki bor Sorkar bad ki bor Khasi Hills Autonomous District Council kiba la thaw ia ka ain ‘The Khasi Hills Autonomous District (Protection and Promotion of Khasi Traditional Medicine) Act, 2011’ka ban ithuh ia ki. U la lyntu ruh ia ki ba kin wanrah ia ka dur bad ka kyrteng u kynbat ba ki pyndonkam khnang bay n lah ban pynneh ia u shuwa ba un duh jait noh.
Na ka liang ka Seng Samla Hima Nongspung, ki la ai khublei ia u Bah John F Kharshiing, Co-Chairman, State Planning Board, & Chairman, SPIKAP uba la wan ban ai jingpynshai halor kane ka phang bad ki la kyrpad ruh ia u ban thaw lad kumno ban ioh sumar ha ki CHC, ki PHC, lane ban ioh ruh ia ka jaka sumar ka jong ki nongsumar da ki dawai kynbat Khasi.
Kiwei kiba la ia kren bad kiba la ia don lang ki long u Bah Kyntiewborlang Syiemlieh, President, bad ki nongkitkam, Seng Samla Hima Nongspung, u Bah M Rani, Acting Chief, u Bah D Syiemlieh, Secretary, Bah S Nongbet, Jt Secy Hima Nongspung, bad kiwei kiwei ki nongkitkam Hima Nongspung.